МИБ төрағаларына полиция өкілеті берілмек

Қазақстанда мүлік иелерінің бірлестіктерін (МИБ) құқықбұзушылықтардың алдын алу жүйесіне тарту жоспарланып отыр. Енді МИБ төрағаларына тұрмыстық құқықбұзушылықтардың алдын алу құқығы берілуі мүмкін. 

Бұл түнгі уақытта шу көтеру, қоқысты рұқсат етілмеген жерге тастау немесе қоғамдық тәртіпті бұзу сияқты жағдайларды қамтиды. Бұл туралы Мәжіліс отырысында ішкі істер министрі Ержан Саденов хабарлады.

Министрдің айтуынша, жаңа «Құқық бұзушылық профилактикасы туралы» заң жобасы МИБ-тердің қоғамдық тәртіпті қамтамасыз етуге қатысуын кеңейтуді көздейді. Алайда, бұл бастама Мәжіліс депутаттарының арасында пікірталас туғызды.

Депутат Екатерина Смышляева төрағаларға мұндай құқық беру жеке өмірге араласу қаупін тудыруы мүмкін екенін атап өтті:

- «МИБ төрағалары — құқық қорғау қызметкерлері емес, тұрғындар тарапынан сайланған азаматтар. Олар үйдің шаруашылық және ұйымдастырушылық істерін атқару үшін таңдалады. Ал құқықбұзушылықтың алдын алу – олардың кәсіби құзыретіне кірмейді», — деді депутат.

Смышляеваның сөзінше, мұндай өкілеттіктер төрағаларды тұрғындармен қақтығыстарға итермелеуі мүмкін және бұл лауазымға үміткерлердің санын азайтуы ықтимал:

- «Оларға осындай өкілеттіктер беру көршілер арасындағы жанжалдарды күшейтпей ме? Әрі бұл төрағалардың жеке өмірге араласуына жол ашпай ма? Мүмкін, мұндай құқықтарды беруде жеңіл әрі нақты шектеулер қажет шығар. Себебі МИБ төрағасы болғысы келетін адамдар қазірдің өзінде аз», — деді ол.

Өз кезегінде министр Ержан Сәденов бұл норманың міндет емес, ерікті қатысу сипатына ие екенін түсіндірді:

- «Профилактикамен айналысу — мемлекеттік органдардың негізгі міндеті. Ал МИБ пен бизнес тек қатысу құқығына ие болады. Яғни, бұл олардың тікелей міндетіне айналмайды», — деді министр.

Сәденов сонымен қатар тұрғындар тұрмыстық құқықбұзушылықтар бойынша МИБ төрағаларына жүгінуге болатынын айтты, бірақ оларды мемлекеттік органмен теңестіруге болмайтынын ескертті:

- «Сізбен келісемін, МИБ төрағаларын мемлекеттік органдармен теңестіру дұрыс емес. Олар үшін жұмсақ әрі нақты жауапкершілік шеңберін белгілеу қажет. Егер заң қабылданса, біз халық арасында түсіндіру жұмыстарын жүргіземіз», — деп түйіндеді министр.

Бүгін, 13:25