Петропавл жылу желілері коммуналдық меншікке берілмек

Петропавл қаласы әкімі баспасөз қызметінің мәліметінше, негізгі мақсат — қаланың жылумен жабдықтау жүйелерін басқаруды біріктіру. Бұл қадам жүйені толық жаңғыртуға, энергияны үнемдеуге және жүйенің үздіксіз, тұрақты жұмыс істеуіне мүмкіндік береді. Қазір Петропавлдағы жылу желілерінің тозу деңгейі 70% асады.

Нәтижесінде «Энергетика және коммуналдық секторды жаңғырту» ұлттық жобасын іске асыруға және тұтынушылар үшін тарифтердің айтарлықтай өсуін тежеу мүмкін болмақ.

— Ұлттық жобаға қатысу және басқаруды біріктіру мемлекет тарапынан жылу инфрақұрылымын жаңғыртуға қаржы тартуға мүмкіндік береді. Бұл өз кезегінде қазіргідей апаттарды жоюдан гөрі жүйелі жаңарту жүргізуге және тарифтік жүктемені азайтуға жағдай жасайды. Жарық пен жылудың үзіліссіз берілуі, тұрғындар мен кәсіпорындарға тұрақты әрі сапалы қызмет көрсету. Әрі тарифтердің тұрақтылығын және экономикалық негізділігін қамтамасыз етуге, сондай-ақ олардың күрт өсуінің алдын алуға бағытталған, — дейді Петропавл қаласы әкімінің баспасөз хатшысы Тимур Жұманов.

Маманның айтуынша, талқыланып жатқан келісімнің негізгі шарттары: алдағы және келесі жылыту маусымдарында жылу желілерінің үздіксіз жұмысын қамтамасыз ету;

«Петропавл жылу желілері» ЖШС қызметкерлерінің еңбек құқықтары мен кепілдіктерін толық сақтау;

Барлық рәсімнің ҚР қолданыстағы заңнамасына қатаң сәйкестікте жүргізілуі.

— Сонымен қатар, коммуналдық меншікке берудің маңызды шарты — «Петропавл жылу желілері» ЖШС-нің жеткізушілер, мердігерлер, қызметкерлер және басқа да серіктестер алдындағы кредиторлық берешегінің болмауы.

Барлық мүдделі тараптар, соның ішінде бұқаралық ақпарат құралдары, құжаттардың түпкілікті пакеті бекітілгеннен кейін ресми түрде хабардар етіледі. Барлық рәсімдерді 2025 жылдың соңына дейін аяқтау жоспарланып отыр — делінген Петропавл қалалық әкімдігінің хабарламасында.

Бұған дейін Ақтау қаласының жылу желілерін реконструкциялауға Үкімет резервінен 3,6 млрд теңге бөлінгенін жазған едік.