Моңғолия құрамасындағы қазақ боксшысы: Арманым Олимпиада чемпионы атану

– Бекнұр, боксты таңдауыңызға не себеп болды?

– Алғашқыда жекпе-жек спортынан гөрі баскетбол, волейбол ойнауға қызығушылығым артты. Бокстың қыр-сырына қанықтырып, қызықтырған білікті бапкер Қайнар Қайсанай ағайым. 2010 жылдан бері осы кісінің тәлімін алып келемін.

– Арманым – Олимпиада чемпионы атану дедіңіз. Әзірге қоржыныңызда қандай қомақты жүлде бар?

– Күштік құрылымдар арасында өткен әлем чемпионатында топ жардым. Азия біріншілігінің қола жүлдегерімін. Елішілік сайыстардағы жетістігім де бір төбе.  

– Моңғолияның ұлттық құрамасына қабылдану жеңіл тимейтіні анық. Іріктеу қалай өтеді?

– Жыл сайынғы ел чемпионатында жүлдеге ілінген боксшыларды қабылдайды. Құрамаға қабылданған әр боксшыға зор жауапкершілік жүктеледі. Азия чемпионатында, әлем біріншілігінде, жазғы Олимпия ойындарында ел үмітін ақтауға күш саламыз.

– Бокстан Қазақстан ұлттық құрамасындағы спортшылармен байланысыңыз қалай?

– Өте жақсы, көпшілігін бұрыннан танимын көпшілігін. Оқу-жаттығу жиындарында бірге әзірлік өткіземіз. Тәжірибемізді бөлісіп, пікір алмасып тұрамыз. Айбек Оралбай, Абылайхан Жүсіпов, ағайынды Махмұд, Төрехан Сабырхандармен жақын араласамын.

– Моңғолияда жастардың спортқа, оның ішінде боксқа қызығушылығы қалай?

– Боксқа ертеректе жастардың қызығушылығы жоғары еді қазір бәсеңдеу, өйткені дзюдоға қызығатындардың қатары көбейді. Олимпиада чемпионы атанған, жүлде алған балуандар бар. Соларға еліктеп, танымал спортшы болсам дейтін жастардың шоғыры қалың. Десе де, боксқа да ықыласты жеткіншектер өсіп келеді.

– Әңгімеңізге рахмет.

Сұхбаттасқан –

Айтолқын Жанат,

ЕҰУ студенті