Нұржан Мұхамедов: АЭС салу елде техникалық интеллигенцияның жаңа буынын қалыптастырады

Мемлекет басшысы Қасым-Жомарт Тоқаев «Turkistan» газетіне берген кең көлемді сұхбатында атом энергетикасын Қазақстанның ұзақмерзімді дамуы үшін стратегиялық маңызы бар бағыт ретінде айқындады. Президенттің айтуынша, сенімді әрі қуатты энергия көзінсіз елдің жаңа технологиялық экономикаға көшуі мүмкін емес, – деп хабарлайды Aikyn.kz.

Президент атап өткендей, жасанды интеллект, суперкомпьютерлер, деректер орталықтары мен автоматтандырылған өндірістердің дамуы электр энергиясына деген сұранысты еселеп арттырады. ҚР Ұлттық ядролық орталығы атом энергиясы институты филиалының өкілі Нұржан Мұхамедовтің айтуынша, осы тұрғыдан алғанда, атом электр стансаларын салу – Қазақстанның индустриялық және цифрлық серпілісін қамтамасыз ететін шешуші қадам.

– Қасым-Жомарт Тоқаев атом энергетикасын дамыту тарихи әділеттілікті қалпына келтіру деп бағалады. Уран өндірісі бойынша әлемдегі көшбасшы елдердің бірі бола тұра, Қазақстанда атом электр стансасының болмауы – ұзақ жылдар бойы жіберілген олқылық екенін атап өтті.

АЭС салу тек энергия тапшылығын шешу емес, сонымен қатар техникалық интеллигенцияның жаңа буынын қалыптастыруға, инженерлік кадрлардың беделін арттыруға және мемлекеттің технологиялық саясатындағы басымдықтарды түбегейлі өзгертуге жол ашады.

Президенттің ұстанымына сәйкес, атом энергетикасы – Қазақстанның энергетикалық қауіпсіздігін нығайтып қана қоймай, елдің халықаралық беделін арттыратын, экономиканың жоғары технологиялы секторларын дамытуға негіз болатын стратегиялық ресурс, – дейді Нұржан Мұхамедов.