Өңдеу секторында цифрлық құралдарды қолданатын кәсіпорындардың үлесі 21% ға дейін өсті

АЛМАТЫ, 6 шілде – Sputnik. Қазақстанда өңдеу секторында цифрлық құралдарды пайдаланатын кәсіпорындардың үлесі 2022 жылғы 13%-дан 2025 жылы 21%-ға дейін өсті. Бұл туралы премьер-министр Олжас Бектенов Екатеринбургтегі XVI "ИННОПРОМ" халықаралық өнеркәсіп көрмесінің алаңында өткен "Индустрия 360: шекарасыз өндіріс" сессиясында айтты, деп хабарлайды үкімет.

"Біз барлық елмен ашықтық пен сындарлы әріптестікке негізделген Әділ және Озық Қазақстанды дамыту бағытын дәйекті түрде жалғастырып келеміз. Адами капиталды, ғылым мен инновацияны дамыту — мемлекет қызметінің негізгі қағидаттары", — деп атап өтті премьер-министр.

Іс-шарада өнеркәсіпті цифрлық трансформациялауға назар аударылды. Бектеновтың айтуынша Қазақстан деректерді талдаудың интеллектуалды жүйелерін, байланыстың өтпелі технологияларын, бұлтты платформаларды және жаңа буын бағдарламалық шешімдерді өндірістік контурға дәйекті түрде енгізуде.

"Өңдеу секторында цифрлық құралдарды пайдаланатын кәсіпорындардың үлесі 2022 жылғы 13%-дан 2025 жылы 21%-ға дейін өсті, ал өнеркәсіптік интернет заттарды пайдаланатын өндірістер саны 7 мыңға жетті", - деп түйіндеді Бектенов.

Көрме барысында елдердің делегация басшылары машина жасау, металлургия, өнеркәсіптік жабдықтар, инновациялық өндірістік шешімдер және заманауи технологиялар саласындағы әзірлемелерді қарап танысты. Қазақстандық павильонда отандық кәсіпорындардың металлургия, машина жасау, IT, тамақ өнеркәсібі және тағы да басқа салалардағы әзірлемелері ұсынылды. Экспозицияға қатысушылар арасында Qarmet, Қазақмыс, Alageum Electric, KamLitKZ, Tengry Tyres, Orda Glass, Silk Road Electronics, BTS ERG және тағы да басқалар бар.