ОПЕК+ мұнай өндіру көлемін қосымша реттеу туралы шешім қабылдады Қазақстан бұл бастаманы қолдады

Қазақстан ОПЕК+ альянсына мүше бірқатар елдермен бірге мұнай өндіру көлемін қосымша түзетуге қатысатынын мәлімдеді. Бұл туралы Мұнай экспорттаушы елдер ұйымының (ОПЕК) баспасөз қызметі хабарлады.

Құжатта Сауд Арабиясы, Ресей, Ирак, БАӘ, Кувейт, Қазақстан, Алжир және Оман елдері әлемдік мұнай нарығындағы тұрақтылықты сақтау міндеттемесін растағаны және өндіру көлеміне қосымша түзетулер енгізу туралы келісімге келгені айтылған.

Бұған дейін, 2023 жылдың сәуірі мен қарашасында ерікті түрде өндірісті қысқартқан осы сегіз мемлекет 2 қарашада онлайн кездесу өткізіп, қазіргі нарықтық жағдайды талқылаған.

Қабылданған шешімге сәйкес, елдер мұнай өндіруді тәулігіне 137 мың баррельге қысқартады. Бұл — 2023 жылдың көктемінде бекітілген 1,65 млн баррельдік қысқартуға қосымша шара болмақ. Жаңа түзету 2025 жылдың желтоқсанында іске асырылады.

Сондай-ақ маусымдық факторларға байланысты 2026 жылдың қаңтар, ақпан және наурыз айларында өндірістің өсуі уақытша тоқтатылады.

ОПЕК өкілдері атап өткендей, жағдай өзгерген жағдайда бұл шектеулер ішінара немесе толық алынуы мүмкін.

«Елдер нарықтағы ахуалды мұқият бақылап, қажет болған жағдайда өндіріс көлемін реттеу жөніндегі қосымша шараларды тоқтату немесе өзгерту мүмкіндігін сақтайды», — делінген хабарламада.

Ұйым 2023 жылдың қарашасында енгізілген тәулігіне 2,2 млн баррельдік ерікті шектеу әлі де күшінде екенін еске салды.

ОПЕК+ бұл шаралар елдерге артық өндіріс үшін өтемақы төлемдерін жедел өтеуге мүмкіндік береді деп мәлімдеді.

Қатысушы мемлекеттер ынтымақтастық туралы декларацияға және ерікті түзетулер жөніндегі міндеттемелеріне адалдығын растады. Қабылданған шешімдердің орындалуын Бірлескен министрлік мониторинг комитеті қадағалайды.

Мұнай өндіру көлемі белгіленген квотадан асып кеткен жағдайда, елдер 2024 жылдың қаңтарынан бастап артық өндірісті толық өтейтінін мәлімдеді.

ОПЕК+ елдерінің ай сайынғы отырыстары нарықтағы жағдайды талдауға және келісімдердің орындалуын бағалауға арналады. Келесі кездесу 2025 жылдың 30 қарашасына жоспарланған.

Бүгін, 11:31