Орталық барлау басқармасы Венесуэлада жасырын операция жүргізуге рұқсат алды

ВВС-дің хабарлауынша, соңғы апталарда АҚШ әскері Кариб теңізінде есірткі тасымалдады деген күдікке ілінген кемелерге кемінде бес соққы жасап, 27 адам қаза тапқан. БҰҰ-ның адам құқықтары жөніндегі сарапшылары бұл шабуылдарды «сотсыз өлтіру» деп айыптады.

Сәрсенбіде Ақ үйде сөйлеген Трамп журналистерге оның әкімшілігі «жердегі операциялар мүмкіндігін қарастырып жатқанын» айтты.

New York Times ақпарат көздеріне сілтеме жасай отырып, Трамп Орталық барлау басқармасына Венесуэладағы операцияларды ауқымды әскери операцияның бөлігі ретінде жүргізуге рұқсат бергенін хабарлады.

«Барлау басқармасына неге Венесуэлаға баруға рұқсат бердіңіз?» деген журналист сауалына Трамп: «Мен екі себеп бойынша рұқсат бердім», - деп жауап берді, - Біріншіден олар түрмелерін босатып, оларды (тұтқындарды) АҚШ-қа жөнелтті... Олар мұнда шекара асып келді».

- Екіншісіне есірткі себеп. Бізге есірткінің көп мөлшері Венесуэладан келеді, ал сол венесуэлалық есірткілердің көбі теңіз арқылы келеді. Біз қазір теңізді бақылайтындықтан, құрлық жөнелтілімдерін қарастырып жатырмыз, - деді АҚШ президенті.

Америка президенті бірнеше рет Венесуэланы өлімге әкелетін фентанил есірткісі саудасының транзиттік нүктесі деп атады. Алайда ресми деректерге сәйкес, Мексика АҚШ-тағы фентанилдің негізгі көзі болып саналады.

Сәрсенбі күні Венесуэла үкіметі Трамптың Орталық барлау басқармасына елде жасырын операция жүргізуіне рұқсат беру туралы мәлімдемесін айыптап, оны халықаралық құқық пен БҰҰ Жарғысын бұзу деп атады.

Reuters агенттігінің хабарлауынша, Венесуэла үкіметінің мәлімдемесінде АҚШ әрекеті Венесуэланың мұнай ресурсын басып алуды көздейтін режимді өзгерту операциясын заңдастыруға бағытталған.

Біз бұған дейін АҚШ Венесуэла жағалауында есірткі тасымалдаушылардың кемесіне соққы жасағанын хабарлаған едік.