Өскеменде көпбалалы отбасының жеке үйінде пеш жарылды

Төтенше жағдай бүгін таңертең облыс орталығының 28-шағын ауданында болған. Қалалық әкімдік мәліметінше, электр желілеріндегі ақау салдарынан пеш қатты қызып, кейін жарылыс болған, деп хабарлайды Arasha.kz.

Бұл үйде ата-анасы және олардың балалары — барлығы алты адам тұрады. Оқиға орнына дереу өрт сөндірушілер жетті.

Құтқарушылардың айтуынша, ұзақ жанатын пеш қазандығының жарылуы салдарынан үйдің бір бөлігін бөліп тұрған қабырға бүлінген. Алдын ала болжам бойынша, жарықтың өшуі мен сорғының тоқтап қалуы себеп болған.

Ең маңыздысы — үй тұрғындары ауыр жарақат алған жоқ. Дегенмен, қыздарының бірі Ана мен бала орталығына жеткізілген.

Денсаулық сақтау басқармасы қыздың (2017 жылы туған) дәрігер тексеруінен өткенін, қажетті зерттеулер жасалғанын және амбулаториялық емге жіберілгенін хабарлады.

Жарылыстан кейін түсірілген видео әлеуметтік желілерде қызу талқыланып жатыр.

Өскемендіктер 28-шағын ауданда жарық пен су мәселесі екі жылдан бері дұрыс шешілмей келе жатқанын, жиі өшірулер болатынын жазады. Тұрғындар орталықтандырылған жылу жүйесін өткізуді талап етуде.

Осы оқиғадан кейін көптеген адамда өз пешінің де жарылып кетуінен қорқуда. Ата-аналар жұмыста болғанда, үйде пеш қосулы қалып, балалар жалғыз қалатын жағдайлар жиі кездеседі, бұл үлкен қауіпке әкелуі мүмкін.

Облыс орталығы әкімдігі зардап шеккен отбасыға уақытша мемлекеттік баспана берілетінін, ал шағын аудандағы электр желілері мәселесі 10 күн ішінде толық шешілетінін мәлімдеді.

«Қазіргі уақытта жарылыс кезінде үйде болған адамдар медициналық тексеруден өтіп жатыр. Алдын ала мәлімет бойынша, өміріне қауіп анықталған жоқ. Жағдай тұрақты бақылауда», -делінген әкімдік хабарламасында.