Осы жылы қазақ спорты кімдерден айырылды?

Qazaq24.com, Egemen.KZ дереккөзінен алынған ақпаратқа сүйене отырып мәлімет бөліседі..

2025 жылы ел спортының дамуына елеулі үлес қосқан және салада есімі ел аузына ілігіп келе жатқан жас таланттар бақилық болды. Еліміздің футболшылары, бапкерлері және спорт ардагерлері түрлі қайғылы жағдайда көз жұмды. Олардың арасында ұлттық құрамада ойнаған спортшылар, жас футболшылар, тәжірибелі жаттықтырушылар мен спортты дамытуға үлес қосқан қоғам қайраткерлері бар. Бүгін біз биыл қазақ спорты кімдерден айырылғанын еске аламыз, деп жазады Egemen.kz.

Фото: Sputnik/Абзал Калиев

Осы жылдың қазан айында Қазақстан ұлттық құрамасының бұрынғы қақпашысы Андрей Морев 52 жасында дүниеден озды.

Андрей Морев «Жеңіс», «Оқжетпес», «Тобыл» және «Ақтөбе» сынды командалар сапында өнер көрсеткен. «Ақтөбе» сапында екі дүркін Қазақстан чемпионы атанып, ел Кубогінің иегері болды. 2005 жылы еліміздегі ең үздік қақпашы атағына лайық деп танылды.

Андрей Морев Қазақстан ұлттық құрамасының қатарында екі матч өткізген. Дебюттік ойынында қарсылас болған Түркия құрамасының пенальтиін сәтті қайтарып, жанкүйерлердің қошеметіне бөленген еді.

Жарыс алдында толық медициналық тексеруден өтсе де Алматыдағы Salomon Trail тау жарысы кезінде 70 жастағы спортшы Владимир Кривенцов көз жұмды.

Ұйымдастырушылардың айтуынша, қарт спортшы жарыс басталған тұста құлап, денсаулығы сыр берген. Төтенше жағдайлар қызметінің мамандары іле-шала алғашқы медициналық көмек көрсетіп, «Медеу» мұз айдыны кешеніндегі құтқару бөліміне жеткізген. Дәрігерлер спортшыны аман алып қалуға бар күш-жігерін салғанмен, спортшы қайтыс болған.

Владимир Кривенцов спортпен кәсіби түрде айналысқан. Полиатлон, президенттік және қысқы көпсайыс түрлерінен Қазақстанның бірнеше дүркін жүлдегері болған. Ол спорттық жарыстарға үнемі қатысып жүрген белсенді спортшы ретінде ел есінде қалары сөзсіз...

Орны толмас қазаның бірі – Қазақстанның бірінші лигасында өнер көрсететін «Хан Тәңірі» клубының ойыншысы Диас Төлеудің жасыл алаңда жан тапсыруы. Қайғылы оқиға «Хан Тәңірі» – «Екібастұз» матчының 64-ші минутында болған. 19 жастағы шабуылшының денсаулығы кенет нашарлап, оны алаңнан зембілмен алып шыққан. Көп ұзамай ойыншының қайтыс болғаны ресми түрде жарияланды. Футболға деген сүйіспеншілігі жоғары жас талант «Қайрат» академиясында тәлім алған.

Биыл «Ақтөбе» футбол клубының 15 жастағы футболшысы Арон Мұса да өмірден өтті. Жас дарын Арон Мұса мен әжесі, немере ағасы газдан уланып бақилық болғаны белгілі болды.

Биыл қазақ халқы «Қайраттың» бұрынғы бапкері, Қазақстан U-19 жасөспірімдер құрамасының аға жаттықтырушысы әрі «Қайрат» ФК академиясының жетекшісі Кирилл Кекерден де айырылып қалды. Ол ұзақ жыл «Қайрат» футбол клубының құрылымында еңбек етіп, академияда жас футболшыларды шыңдаумен айналысқан. 2022–2024 жылдар аралығында алматылық клубтың негізгі командасын тізгіндеген, сонымен қатар 2024 жылы «Ордабасы» футбол клубының бас бапкері қызметін атқарған. Кирилл Кекер футболшы ретінде де жұртшылық жадында. Ол «Қызылжар», «Оқжетпес», «Сұңқар» және «Шығыс» командаларының сапында қорғаушы болып доп тепкен.

Желтоқсанда Алматы – Бішкек тасжолында болған жол апаты 5 спорт ардагерінің өмірін жалмады. Қайғылы оқиға Бішкектегі футбол турнирінен қайтып келе жатқанда болған.

Қаза тапқан спортшылардың есімі:

Асыл Ибраимов – есту қабілеті шектеулі спортшылардың футболдан жаттықтырушысы; Дмитрий Мочальский – сурдлимпиялық чемпион, шахматтан Еуропа чемпионы; Сәкен Смағұлов – футбол ардагері, есту қабілеті шектеулі ұлттық құраманың ойыншысы; Сергей Волковинский – футбол ардагері, ұлттық құрама мүшесі; Серік Молдашев – футбол ардагері, ұлттық команда ойыншысы.

Қазақ спортының беделін биіктету жолында тер төккен спортшылардың жарқын бейнесі жадымызда қалары сөзсіз...

Бұған дейін 2025 жылы Қазақстан спортшылары қандай тарихи жеңістерге қол жеткізгені туралы жазған едік.

Соңғы жаңалықтар