Өзіңізге қарамайсыз ба? : белгілі коуч ерекше баланың анасын орынсыз сынап, жұрттың көзінше кінәлады

Белгілі коуч, Қазақстандағы қазақтілді бизнес клубтың негізін қалаушы Бақытбай Сабырбек әлеуметтік желіде семинарының бірінен видео жариялап, ерекше баласы бар ананы көпшіліктің алдында сынап, орынсыз пікір айтқаны үшін көптің наразылығына ұшырады, – деп хабарлайды Aikyn.kz сайты.

Видеода коуч алдымен көпбалалы ананың жасын сұрап, оның сырт келбетіне қатысты сыни пікір білдіреді:

“Мама! Мен сізді шамамен 48 жаста шығар деп ойладым! Қатты шаршағансыз! 42 жаста болса да менімен шамалас көрінетін әйелдер отыр ғой. Алты баласы бар. Неге өзіңізге қарамайсыз?”, – дейді ол.

Әйел ерекше бала тәрбиелеп отырғанын айтқанда, Сабырбек оның баласының даму ерекшелігіне күмәнмен қарап, мынадай сұрақ қояды:

“Сіз қалай ойлайсыз, бұл бала неге дамымай жатыр?”

Анасы бұл сұрақтың жауабын жылдар бойы іздеп жүргенін, баласымен көп уақыт ауруханада өткізгенін және баласының қазір оны танитынын, құшақтайтынын, бірақ әлі сөйлей алмайтынын айтып түсіндіреді.

Бірақ коуч одан әрі ананың жеке өміріне үңіліп, жүкті кезінде не ойлағанын, ер адамға қалай қарағанын сұрайды. Әйел сол уақытта бизнеске көбірек көңіл бөліп, өзімшіл болғанын және жақындарынан алыстап кеткенін айтады.

Сабырбек өз ойын былайша түйіндейді:

“Сіздің санаңызда барлық ер адам әлсіз, әкеңіз әлсіз, күйеуіңіз әлсіз, соның салдарынан бала да сондай болып шыққан. Ал бала әлсіз болғысы келе ме? Жоқ. Сондықтан ол ауырады, алға жылжымайды.”

Бұл пікірлер көпшіліктің ашуын тудырып, әлеуметтік желі қолданушылары коучты адамгершіліктен аттағаны және ананың жағдайына жанашырлық танытпағаны үшін қатты сынға алды.

Мамандардың пікірінше, осындай жағдайлар қоғамдағы ерекше бала тәрбиелеп отырған ата-аналарға түсіністікпен қараудың қаншалық маңызды екенін көрсетеді.