Павлодар көшелеріне Әділет брендімен безендірілген трамвайлар шықты

Павлодарда «Әділет» партиясының сайлауалды науқаны тың форматпен жалғасты. Қаладағы жолаушылар трамвайлары күн сайын мыңдаған тұрғынға қызмет көрсетумен бірге енді партия брендімен безендіріліп, сайлауалды бағдарламасын халыққа таныстыратын көшпелі ақпарат орталығына айналды.

Партияның Павлодар облыстық филиалының төрағасы Асылбек Туғанбайдың айтуынша, мұндай формат бекер таңдалып отырған жоқ. Трамвай – Павлодардың ажырамас символдарының бірі әрі тұрғындар ең көп пайдаланатын қоғамдық көлік.

Оның сөзінше, партияның символикасымен безендірілген бес вагон қаланың барлық бағыты бойынша, соның ішінде шеткі аудандарға дейін қатынайды. Ал оған мінген жолаушылар жол үстінде «Әділетті болашақ үшін» сайлауалды бағдарламасының негізгі бағыттарымен танысып, Құрылтай депутаттығына кандидаттармен тілдесіп, өздерін толғандырған мәселелерді көтеріп, ұсыныс-пікірлерін жеткізе алады.

Павлодар қаласының Трамвай басқармасының директоры Мүслім Махмұдовтың мәліметінше, безендірілген трамвайлар күн сайын бес бағытта жүріп. шамамен бес мың жолаушыны тасымалдап отырады. Сондай-ақ кәсіпорындағы ADILET партиясының бастауыш партия ұйымына 500-ге жуық қызметкер мүше. Бұл – ұжымның 95 пайызы.

Жаңартылған трамвайға алғаш мінгендердің бірі өз әсерін жасырмады.

«Трамвайдың жаңарған түрін көргенде, қуанып кеттім. Бұрынғыдан өңі кіріп қалған екен. Сосын ішіне кіргенде партияның өкілдерін көрдім. Олар бағдарламасы туралы айтып берді. Сұрақтарымызға жауап берді. Аяқ астынан осындай қызық болды. Олармен сөйлестік. Жылы шырайлы, жылы жүзді адамдар екен», – дейді тұрғын.

Партияның Павлодар облыстық сайлауалды штабының жетекшісі Илья Теренченконың айтуынша, брендтелген трамвайлар – өңірде өтіп жатқан кең ауқымды сайлауалды жұмыстың бір ғана бөлігі.

Қазір партия өкілдері Павлодар, Ақсу, Екібастұз қалаларында және облыстың барлық аудан орталықтарында тұрғындармен кездесулер өткізіп жатыр. Мұндай кездесулердің негізгі мақсаты – партияның «Әділетті болашақ үшін» бағдарламасын түсіндіріп, халықтың ұсыныстары мен пікірлерін жинау.

Брендтелген трамвайлардың таныстырылымына партияның Павлодар облыстық сайлауалды штабының мүшелері, Құрылтай депутаттығына кандидаттар, жастар қанатының белсенділері және Д.Д. Махмудов атындағы Трамвай басқармасының басшылығы қатысты.

 Дайындаған:

«Әділет» партиясының баспасөз қызметі. «Әділет» партиясы» ҚБ сайлау қорының қаражаты есебінен төленді.
Тапсырыс беруші: Н.Т. Мыңжасаров.