Павлодарда трассадағы қар бөгейтін қалқандарды көбейту көзделіп отыр

Павлодар облысы — елімізің орталығын шығыс өңірлермен және Ресеймен байланыстыратын транзиттік дәліз. Жер бедерінің жазық болуы себепті қыста жел үп етсе, қарлы боран соғып қоя береді. Сондықтан қыста қар басатын учаскелерді тұрақты бақылап, жол тазарту жұмысын мұқият ұйымдастыру өңірдегі мердігер компанияларға сын.

Қыста ең жиі жабылатын жол — елордаға апаратын автобан. Боран соқса, көктайғақ пайда болса автобан жабылуға дайын тұрады. Арқаға бет қаратпайтын аяз бен көз аштырмайтын боран әлі жетіп үлгерген жоқ. 

Бірақ былтыр қараша айының өзінде аталған жол ауа райына байланысты бірнеше рет жабылды. Бұл мәселе биыл да туындауы мүмкін. 

Аталған жолмен тұрақты жүретін көлік жүргізушілердің ойынша, жол тазалаумен айналысатын компанияның қыста жолды тазалауға, көктайғаққа қарсы материалды шашуға әлеуеті жеткіліксіз.

Ал «ҚазАвтоЖол» АҚ Павлодар облыстық филиалының дерегінше, республикалық маңызы бар автожолдарды қысқы уақытта күтіп ұстауға биыл айрықша көңіл бөлініп отыр.

Республикалық автожолдардың жалпы ұзындығы — 1663 шақырым. Жолдарға қызмет көрсетуге биыл 5,75 млрд теңге бөлінген.

— Жұмысты атқаруға 317 адам, 107 техникамыз бар. Оның ішінде шнекоротор - 9, КДМ - 49, автогрейдерлер-15 бірлік, тракторлар (К-700, МТЗ және т. б.) — 26, бульдозерлер - 3, тиегіштер — 9. Қосымша мамандандырылған 31 техника, аспалы жабдығы бар 6 трактор сатып алуға конкурстық рәсімдер жүргізіліп жатыр, — деп хабарлады компанияның өңірлік филиалының директоры Ермұрат Нұрханов.

Филиал «КАЖсервис» ПОФ ЖШС қызмет көрсету ұйымымен бірлесіп алдағы қысқы кезеңде автомобиль жолдарын күтіп ұстауға қатысты іс-шаралар жоспарын әзірлеген.

Әрі ұйымдастыру мәселелерін шешу және барлық бөлімшелердің іс-қимылдарын үйлестіру үшін жедел штабтар мен жұмыс штабтарын құрған.

— Қар басатын учаскелердің мәселесіне баса маңыз беріп отырмыз. Қар ұстап қалатын жерлер бойынша арнайы жол картасы әзірленіп, жалпы ұзындығы 2210 шақырым қар ұстайтын траншеялар мен біліктер, 4908 метр қалқан орнату көзделген. Қазіргі күні жол бойында қар ұстауға арналған 29 мың метрден астам темірбетонды қоршаулар бар. Олардың кейбірі жаңартылып, сигналдық бағаналар орнатылды. Бұдан бөлек, жолдар айналасындағы бұталар мен шөптерді, ағаштарды шабу, жолдағы шұңқырларды жөндеу сияқты жұмыстар атрақылып жатыр, — деп қосты ол.

Алдағы қыста көктайғаққа қарсы себу үшін 11 мың текше метрден астам құм, 4 мың тоннадан астам тұз дайындалған. Автожолдардың бойында 10 жылыту пункті жұмыс істейді.

Посмотреть эту публикацию в Instagram

Публикация от Павлодарский ОФ АО «НК «ҚазАвтоЖол» (@qaj_pavlodar)

Еске сала кетейік, Астана — Павлодар автобанының жырға айналған бөлігі жөнделетін болды.