Павлодарлық сегіз жасар қыздың арман орындалып, оған жүйрік тұлпар сыйлады

Павлодар қаласында сегіз жастағы Ясмина Қожанованың көптен күткен арманы орындалды, – деп хабарлайды Aikyn.kz сайты.

Жаңа жыл қарсаңында ол өзіне жеке ат сыйға алды. Жас шабандоз ерте жастан бастап атқа мінуге әуес болып қана қоймай, ұлттық дәстүрді дәріптеуге де өз үлесін қосып келеді.

Бұл оқиға Ясминаның павлодарлық «Тұлпар Павлодар» ат клубының Instagram парақшасындағы жазылушыларға қойған сұрағынан басталды: егер парақша 10 мың жазылушы жинаса, оның өз аты болу арманы орындала ма деген үмітін білдірген еді. Қыздың бастамасы көпшіліктің кең қолдауына ие болып, нәтижесінде жазылушылар саны 17 мыңнан асты.

- Біз Ясминаның идеясын қолдадық, ал нәтиже күткеннен де жоғары болды. Бұл адамдардың игі істер үшін біріге алатынын көрсетті,-деп атап өтті ат клубының өкілдері.

Тұлпар табысталған сәтте Ясмина шынайы алғысын білдіріп, тәлімгерлеріне және өз арманының орындалуына атсалысқан барлық жанға ризашылығын жеткізді.

Ясмина алты жасынан бері атқа мінумен айналысады. Оның алғашқы ұстазы — әкесі. Нұсқаушылар қыздың табиғи қабілетін ерекше атап өтеді: ол аттың көңіл күйін нәзік сезініп, оны сенімді түрде басқара алады. Бос уақытын ол көбіне ат үстінде өткізеді.

«Тұлпар Павлодар» ат клубы өңір тұрғындарының ата-баба дәстүріне деген қызығушылығы артып келе жатқанын да атап өтті. Жаз мезгілінде атпен серуендеуге күн сайын жүзге жуық адам қатысса, қыс айларында бұл көрсеткіш 30-40 адамды құрайды. Атқа міну бүгінде отбасылық әрі сауықтыру демалысының танымал түріне айналып отыр.

Кішкентай Ясминаның оқиғасы — арман, сенім және адамдардың қолдауы тоғысқанда қандай ғажайып нәтижеге қол жеткізуге болатынының жарқын үлгісі. Цифрландыру дәуірінде өңір тұрғындары табиғатқа және мәдени тамырларына қайта бет бұрып жатыр, ал жас павлодарлық қыз үшін бұл жол жылқыларға деген үлкен сүйіспеншіліктен басталды.