Педагог мәртебесі туралы түзетулер ата ананың жауапкершілігін арттырады депутат

Депутаттың айтуынша, алғаш рет 2007 жылы Білім туралы заңға өзгерістер енгізіліп, педагог құқығын қорғайтын талаптар пайда болды. Ал педагог мәртебесі туралы арнайы заң 2019 жылы қабылданды.

— Қазіргі сол заңға түзетулер енгізу көзделіп отыр. Себебі заң заман талабына сай жетілдіріп отыруы керек. Қазіргі заң жобасының басты қағидаты — педагогтерді шамадан тыс жүктемеден арылту, өз қызметіне жатпайтын жұмыстарға тартпау. Оның авторлары — бұрынғы министр Асхат Аймағамбетов пен Құдайберген Бексұлтанов. Расында да біз педагогты шамадан тыс жүктеуге қарсымыз. Олар тек өз қызметімен айналысуы керек, — деді Мәжіліс депутаты Jibek Joly телеарнасына берген сұхбатында.

Сонымен бірге, жаңа заң жобасында оқушылардың да, педагогтердің да сабақта смартфон ұстауына тыйым салынуы мүмкін. Бұл бастама білімнің сапалы берілуі мен балаларды буллингтен қорғау үшін ұсынылып отыр және министрліктің арнайы бұйрығымен қосымша бекітіледі.

— Жаңа түзетуде мұғалімнің жауапкершілік уақытын нақты көрсету көзделіп отыр. Себебі қазір барлық жауапкершілікті мұғалім мен мектепке іліп қойдық. Ата-ана жауапкершілігі көлеңкеде қалып отыр. Мәселен, АҚШ мектептерінің алдында арнайы қызыл сызық бар. Сол сызықтан асқан соң балаға мектеп әкімшілігі жауап бермейді. Біз де ана-ата жауапкершілігін көбейтуге басымдық береміз. Ал мұғалім бос уақытын өз қызметін жетілдіруге арнауы керек. Баламен қарым-қатынасты зерттеп, білімін дамытуы керек, — деді Нұргүл Тау.

Еске сала кетсек, Мәжілісінің қарауына «ҚР кейбір заңнамалық актілеріне педагог мәртебесі және білім беру мәселелері бойынша өзгерістер мен толықтырулар енгізу туралы» заң жобасы енгізілді.

Енді мұғалімдер оқушының өмірі мен денсаулығына тек оқу процесі кезінде жауапты болмақ.