Петропавлда көлік жүргізушісі өрттің дүкенге таралуына жол бермеді

Оқиғаның бейнежазбасы әлеуметтік желіде тарады. 

Посмотреть эту публикацию в Instagram

Публикация от ПЕТРОПАВЛОВСК | СКО (@skopetro)

Видеодан өртеніп, лапылдап жанған жеңіл көлікті екінші көліктің сүйрегенін көруге болады. 

Солтүстік Қазақстан облысы төтенше жағдайлар департаменті баспасөз қызметінің мәліметінше, 25 ақпан күні сағат 17:35–те «101» жедел нөміріне Петропавлдағы Жұмысшы кентінде, Панфилов көшесінде жеңіл автокөліктің өртенгені туралы хабарлама түскен. 

Оқиға орнына жедел жеткен мамандар көліктің қозғалтқыш бөлігінен шыққан өртті сөндірді. Автокөлік газ-баллон жабдығымен жабдықталған екен. Алдын ала болжам бойынша, өрттің шығуына электр сымдарының қысқа тұйықталуы себеп болған. 

Кейін белгілі болғандай, көлік өрт шыққан кезде дүкен маңында тұрған. Көлік иесінің қолда бар құралдармен өртті сөндірмек болған әрекеті нәтиже бермеген.

— Сол сәтте өтіп бара жатқан жеңіл көлік жүргізушісі жағдайға жедел әрекет етіп, жанып жатқан автокөлікті қауіпсіз жерге жылжыту туралы шешім қабылдаған. Арқанмен тіркеп, ол көлікті жол жиегіне сүйреп апарған. Нәтижесінде өрттің дүкен ғимаратына және жанындағы адамдар тұрған автобус аялдамасына таралуына жол бермеді, — дейді департамент мамандары.

Ал өрт сөндіру жасағы келгеннен кейін жүргізуші оқиға орнынан кетіп қалған. Қазіргі уақытта оның жеке басы анықталып жатыр.

Бұған дейін Ақтөбеде «Рамазан» құс фабрикасының қоймасы өртенгенін жазған едік.