Петропавлда қазақ полицейді иттер деп атап, қорқытқан азамат сотталды

Петропавл тұрғыны полицейлерді «иттер» деп атап, оларды өлтіремін деп қорқытқаны үшін 5,5 жылға сотталды, деп хабарлайды Arasha.kz.

Бұл оқиға шамамен бір жыл бұрын отбасы жанжалынан басталған. Петропавл қаласының жаңа «Бірлік» шағын ауданында тұратын Юрий Солонкин өз үйінде жанжал шығарады.

Полицияға оның әйелі шағымданған, деп жазды Halyqstan телеграм арансы.

Учаскелік инспектор Ерлан Нөгербеков отбасы бұзақысын түсініктеме беру үшін полиция бекетіне шақырады. WhatsApp арқылы хабарлама жіберіп, жауап күткен.

Бірақ Солонкин керісінше инспекторға боқтық сөздер мен қорлау, сондай-ақ өлтіремін деген мазмұндағы дауыс хабарламаларын жолдайды.

«Солонкин Юрий Юрьевич Нөгербеков Ерлан Серікұлын ұлтына қатысты қорлап, қазақ ұлтының өкілдеріне деген теріс көзқарасын бейәдеп түрде білдірген. Нөгербековтің заңсыз әрекеттерді тоқтату туралы ескертуіне қарамастан, Солонкин өз қорлауын жалғастырған», – делінген қылмыстық істің материалдарында.

Бірнеше күннен кейін учаскелік инспектор оған қайта хабарласып, полиция пунктіне келу қажеттігін еске салады. Бірақ Солонкин тағы да боқтап, қорлаған жауап қайтарады.

Сол күні бірнеше сағаттан соң патрульдік полицейлер оны басқа ауданда көлігінің ішінде ұйықтап жатқан жерінен табады. Көп ұзамай оқиға орнына Ерлан Нөгербеков те әріптесімен бірге келеді.

Солонкин бұл жолы да тынышталмай, патрульдік полицейлер мен учаскелікке балағат сөз айтып, қорқытқан. Тіпті айықтырғышқа апара жатқанда да «иттер» деп атап, барлығын атып тастаймын деп қоқан-лоқы көрсеткен.

Медициналық сараптамадан өтуден бас тартып, тәртіп сақшыларына қарсыласып баққан.
Нәтижесінде Солонкинге үш бап бойынша айып тағылды: билік өкілін қорлау, өлтіремін деп қорқыту және ұлттық араздықты қоздыру. Сот үкімімен ол 5 жыл 6 айға бас бостандығынан айырылды.