Пітір садақасы қалай есептеледі және кімдер береді?

Сурет: freepik.com

Пітір садақа – мұсылман үшін Рамазан айында берілетін уәжіп садақа. Ол оразаның кемшіліктерін толықтыру және мұқтаж жандарды қуанышқа бөлеу мақсатында беріледі.

1. Пітір садақа мөлшері қалай есептеледі?

Қазақстанда пітір садақа мөлшері екі келі ұнның орташа бағасымен белгіленеді. Биылғы көрсеткіш – 735 теңге. Сонымен қатар, бай адамдарға құрма (12 400 теңге) немесе мейіз (6 400 теңге) құнымен беру ұсынылады.

2. Кімдерге беру міндетті?

Ханафи мәзһабы бойынша, мал-мүлкі күміс нисабына (595 гр) жеткен мұсылман өзі және отбасы үшін пітір садақа береді. Байлығы жетпегендерге міндет емес, бірақ сауап үшін берсе болады.

3. Кімдерге беріледі?

Құранда көрсетілгендей, пітір садақа жағдайы жоқтарға, міскіндерге, қарызға батқандарға, Алла жолында қызмет етіп жүргендерге және жолда қалған жолаушыларға беріледі. Тікелей ата-анаға, балаға, әйеліне берілмейді.

4. Қай уақытқа дейін беріледі?

Пітір садақаны Рамазан айы басталғаннан айт намазына дейін беру керек. Айт намазына дейін беру – мұстахаб.

5. Не үшін беріледі?

Пітір – «дененің зекеті». Ол оразада кеткен қателіктерді толықтырады және кедейлерге айт мерекесінде қуаныш сыйлайды.

6. Бірнеше адамға бөлуге бола ма?

Бір адамның пітір садақасы бір мұқтажға беріледі. Бірақ бірнеше адамның садақасын біріктіріп, бір отбасына беруге болады.

7. Мешітке апару міндетті ме?

Жоқ. Пітір садақаны мешітке апаруға да, банк қосымшалары арқылы онлайн аударуға да болады.

8. Мешіт ақшаны қалай үлестіреді?

Мешіт қызметкерлері пітір садақасын тізімдегі мұқтаждарға үлестіреді. ҚМДБ жанындағы комиссия қаражаттың дұрыс жұмсалуын қадағалайды.

Бүгін, 17:47