Қарағанды облысында полицейлер жүргізуші куәлігінсіз жолаушы тасымалдағандарды ұстады

Рейд барысында патрульдік полиция қызметкерлері Қызылорда — Жезқазған — Қарағанды — Шідерті автожолында Toyota Estima көлігін тоқтатқан. Polisia.kz порталының мәліметіне сүйенсек, тексеру кезінде жүргізушінің жүргізуші куәлігінен айырылғанына қарамастан, қалааралық бағытта жолаушылар тасымалдап жүргені анықталған. 

Ұқсас дерек Астана — Қарағанды — Алматы тасжолында да тіркелді. Полицейлер жүргізуші куәлігінен айырылған Toyota Alphard автокөлігінің жүргізушісін ұстады.

Сонымен қатар облыс жолдарының бірінде Mercedes Sprinter көлігінің жүргізушісі отырғыш орындарын ұйықтайтын орындарға қайта жабдықтағаны үшін жауапкершілікке тартылды.

Көліктер айып тұрағына қойылды. Полиция азаматтардың қауіпсіздігін қамтамасыз ету мақсатында заңсыз жолаушылар тасымалымен күресті жүйелі түрде жалғастырып жатыр.

Тәртіп сақшылары жүргізушілерді жол қозғалысы ережелерін және жолаушыларды тасымалдаудың белгіленген талаптарын қатаң сақтауға шақырады.

Еске сала кетейік, бұған дейін Павлодар облысында ер адамды қағып, оқиға орнынан кетіп қалған жүргізушілер полицияға жеткізілгенін жазғанбыз.