Қарағандыдағы Бөкетов университетінің студенттерінен туберкулез анықталды

Академик Е. А. Бөкетов атындағы Қарағанды зерттеу университетінің студенттерінен туберкулез анықталды. Бұл ақпаратты Tengri Health тілшісіне өңірлік санитарлық-эпидемиологиялық бақылау басқармасы растады.

Қанша студенттен туберкулез анықталды?

Әлеуметтік желілерде академик Е. А. Бөкетов атындағы Қарағанды университетінің 10 студенті туберкулезге шалдықты деген ақпарат тарады.

"Ешкім ештеңе айтпай ма? Карантин енгізу керек қой! Тағы қанша студент ауырып, бір-біріне жұқтырып жатыр? Не карантин, не дұрыс дезинфекция жоқ!" - деді жазба авторы.

Скриншот: Threads

Ресми түрде он адамның ауырғаны туралы ақпарат расталмады.

Қарағанды қаласы Қазыбек би ауданы санитарлық-эпидемиологиялық бақылау басқармасының басшысы Нұрлан Аймағанбетов жоғары оқу орнында туберкулез жағдайларының шынымен тіркелгенін, бірақ әңгіме үш студент туралы болып отырғанын айтты.

Оның айтуынша, олар әртүрлі факультеттерде оқиды және бірге тұрмайды.

"Біреуі биология-география факультетінде, екіншісі - шет тілдері факультетінде, үшіншісі - журналистика факультетінде оқиды. Әрқайсысы жатақханада емес, әртүрлі мекенжайдағы пәтерлерде тұрады", - деп атап өтті Нұрлан Аймағанбетов.

Бірінші жағдай 22 қыркүйекте, екіншісі келесі күні тіркелген. Үшінші студент туралы шұғыл хабарлама 24 қыркүйек күні кешке түскенін.

Әзірге мамандар бұл жағдайлардың өзара байланыстылығын анықтаған жоқ. Қазіргі уақытта санитарлық-эпидемиологиялық бақылау басқармасы тексеру жүргізіп, науқастармен байланыста болған адамдардың тізімін жасап жатыр.

"Жақын және қашық байланыста болғандар тексеріліп жатыр. Тексеру жүргізіліп, кімде ауру бар-жоғы және олардың соңғы рет қашан тексеруден өткені анықталады", - деп түсіндірді басқарма басшысы.

Нұрлан Аймағанбетов университетте дезинфекция жұмыстары жүргізілгенін хабарлады. Сонымен қатар, оның айтуынша, анықталған туберкулез жағдайларына байланысты университетте карантиндік шаралар енгізілмейді.

Бізді Google-дың негізгі дереккөздер тізіміне қосыңыз

Қарағанды

университет

Туберкулез

ЖОО

студент