Қазақ асханасы La Liste жүлдесін алды

Францияда әлемнің ең беделді кулинарлық байқауларының бірі La Liste қорытындысы жарияланды, деп хабарлайды 24KZ. Рейтинг жыл сайын дүниежүзіндегі ең мықты 1000 мейрамхананы анықтайды. Былтыр тізімге Алматы мен Астанадан 4 дәмхана енді. 2026 жылғы тізім бойынша Орталық Азия елдері арасынан алғашқы болып Қазақстан қатысты. Қазақ тағамдары шетелдік шефтердің назарын несімен аударды? Ең дәмді мейрамхана қай елге тиесілі?

La Liste байқауын «гастрономия әлемінің Оскары» деп атайды. Жыл сайын үздік атану мақсатында бәсекеге мыңдаған мейрамхана, қонақүй және кондитерлер түседі. Рейтингке ену үшін мыңнан астам сараптамалық дереккөз бен миллиондаған халықаралық пікір сүзгісінен өту керек. Мерейтойлық 10-шы рәсім Франция Сыртқы істер министрлігінің тарихи ғимаратында өтіп, 200 елден келген үздік аспаздарды жинады.

Филипп Фор, La Liste байқауының негізін қалаушы:

- La Liste – әлемдік гастрономиялық гидтердің бір ортақ жүйесі. Тізімде Қазақстан ресторандарының орын тапқаны – біз үшін қуанышты оқиға. Орталық Азиядан бірінші ел болып қатысып отыр. Біз үшін әрбір жаңа асхана – әлемдік дәм картасын толықтыратын құндылық.

Азиядағы маңызды гастро-дестинация ретінде La Liste-тің жеке марапатына ие болу – шеф-аспаз Артём Канцев бастаған команданың кәсіби жұмысының айғағы. Сонымен қатар Франциядағы қазақстандық әйелдер қауымдастығы бастамаларының да ықпалы зор болды. Салтанатты шарада қонақтарға түйе етінен жасалған хамон мен құрма, трюфель қосылған қазы, киік еті қосылған тоқаштар ұсынылды. Күтпеген дәм үйлесімі француз гастросыншылары мен Мишлен жұлдызды шефтердің таңданысын тудырды.

Жорж Бланк, Мишлен жұлдызды шеф-аспаз:

- Бұл дәмдер мен үшін жаңалық. Еліңізге барып көрмесем де, бүгінгі таныстырылым Қазақстан асханасының мүмкіндігін көрсетті. Халықаралық гастрономиямен мұндай байланыс құрметке лайық.

Жюли Андриё, тележүргізуші және гастросыншы:

- Францияда қазақ асханасымен танысу – күтпеген қуаныш. Түйе етін, ірімшікті, мұнда сирек кездесетін құрманың дәмін татып көрдім. Дәмдердің үйлесімі ерекше: бір жағынан тосын, бір жағынан таныс. Шынымды айтсам, Қазақстанға барып, асханасын жақыннан көргім келіп тұр.

Қазақстан үшін La Liste байқауы әлемге өзін жаңа гастрономиялық бағыт ретінде танытудың үлкен мүмкіндігі деп санайды қазақстандық аспаз.

Артём Канцев, қазақ мейрамханасының шеф-аспазы:

- Бүгінгі күн – Қазақстан гастрономиясы үшін жаңа белес. Бұл бүкіл салаға серпін беретіні сөзсіз. Бүгін біздің бірегей өнімдерге халықаралық қызығушылықтың артып келе жатқанын анық көрдік.

2026 жылдың жаңа рейтингі Францияның әлі де көш басында екенін көрсетеді. Бірақ биыл Скандинавия асханасының ықпалы күшейіп, Азияның гастрономиялық салмағы айтарлықтай артқан. Сыншылардың сөзінше, әлемдік дәм картасының орталығы күн сайын өзгеріп жатыр. Бұған қазақстандық аспаздардың да қосқан үлесі зор.

Авторлары: Айдана Айтбекқызы, Руслан Өміржан