Қазақстан 2027 жылы қанша қаражат алады және оны неге жұмсайды үкімет бюджетті жариялады

Үкімет отырысында Қаржы министрлігі 2027 жылға арналған республикалық бюджет жобасын таныстырды. Мемлекет қанша қаражат жинауды жоспарлап отыр, қаншасын жұмсайды және негізгі шығындар қайда бағытталады – Tengrinews.kz тілшісінің материалында.

Ел қазынасына қанша қаржы түседі?

Қаржы министрі Мәди Такиевтің мәліметінше, қазынаға түсетін жалпы түсімдер 25,6 триллион теңге деңгейінде жоспарланған. Сонымен қатар трансферттерді есепке алмағандағы елдің меншікті кірістері 19,9 триллион теңгені құрайды.

Қазақстан бюджетіне барлығы 5,5 триллион теңге трансферт түседі.

Әдетте бұл Ұлттық қордан және дербес өңірлердің бюджеттерінен бөлінетін қаражат.

Қазақстанның 2027-2029 жылдарға арналған бюджет жобасы. Үкімет мәліметтері

Ұлттық қордан 4,4 триллион теңге бағыттау жоспарланған: оның 2,4 триллионы – кепілдендірілген трансферт, тағы 2 триллионы – нысаналы трансферт түрінде.

"Бұл қаражат аса маңызды нысандар мен жалпыұлттық маңызы бар жобаларға жұмсалады", – деді Тәкиев.

Бюджет тапшылығы қандай болмақ?

Министр 2027 жылы республикалық бюджеттің жалпы шығыстары 30 триллион теңгеге жететінін атап өтті. Бюджет тапшылығы минус 4,5 триллион теңге деңгейінде қалыптасады.

Қаражат неге жұмсалады?

Ұсынылған деректерге қарағанда, басты басымдық – әлеуметтік шығындар. Оларға 10,5 триллион теңге бөлінеді.

"Бюджет жобасында алушылар санының өзгеруі, халықты әлеуметтік қолдаудың қажетті деңгейін қамтамасыз ету үшін әлеуметтік төлемдерді индекстеу ескерілген", – деп түсіндірді министр.

Қаржыландыру көлемі бойынша екінші орында өңірлерді дамыту тұр, бұған 7,2 триллион теңге жұмсалады.

Экономиканың нақты секторын қолдауға 3,8 триллион теңге қарастырылған, ал мемлекеттік борышқа қызмет көрсету 3,5 триллион теңгені құрайды.

Күш құрылымдарына 3,3 триллион теңге бөлінеді, ал әкімшілік мемлекеттік органдарды ұстауға 787 миллиард теңге негізделген.

Бұдан бөлек, бюджет жобасында қаржылық резервтер қарастырылған. Мысалы, үкімет резерві - 370 миллиард теңге.

Бір жыл бұрын жағдай қандай болды?

2026 жылға арналған бюджет жобасында 22,8 триллион теңге кіріс алу жоспарланған еді. Оның 18,8 триллион теңгесі немесе 80 пайызы салықтар есебінен түсуі тиіс болатын. Тағы 2,7 триллион теңгені Ұлттық қордан бюджетке аудару көзделген еді.

Бұл ретте шығыстар кірістерден асып түсуі керек еді: 2026 жылы 27,7 триллион теңге жұмсау жоспарланған болатын.

Қазақстан бюджеті қалай қабылданады?

Заң бойынша Қазақстан бюджеті бірден үш жылға жасалады. Бұл процесс шамамен былай жүреді:

Алдымен үкімет мемлекеттің қанша қаражат алатынын және қанша жұмсай алатынын есептейді. Осы есептеулер негізінде бюджет жобасы дайындалады. Онда шығыстар егжей-тегжейлі жазылады: министрліктер мен өңірлер қанша алады, зейнетақы мен жәрдемақыға, мемлекеттік бағдарламаларға және басқа да қажеттіліктерге қанша қаржы бөлінеді. Содан кейін жоба үкіметке таныстырылады. Осыдан кейін бюджет жобасы Парламентке беріледі. Депутаттар оны қарап, талқылайды және өзгерістер енгізе алады. Әдетте шығыстарды өзгерту бойынша ұсыныстар мемлекеттік органдар мен бюджеттік бағдарламалар әкімшілерінен түседі. Депутаттар бұл ұсыныстарды қарастырып, оларды қолдау-қолдамау туралы шешім қабылдайды.

Барлық кезеңнен өткеннен кейін бюджет туралы заң Президентке қол қоюға жіберіледі. Қол қойылғаннан кейін бюджет күшіне енеді.

Тағы оқыңыз: 2027 жылы инфляция қандай болады: үкімет болжамы

Google News арқылы жаңалықтарымызды қадағалаңыз

Жазылу