Қазақстан 5 жылда импортқа 278 млрд доллар жұмсаған

Еділ Жаңбыршин Мәжілісте өткен Экология мәселелері және табиғат пайдалану комитетінің отырысында елдің импортқа тәуелділігі мен отандық өндірісті дамыту мәселесін көтерді.

Депутаттың мәліметінше, 2021-2025 жылдар аралығында Қазақстан импорттық тауарларға жалпы 278 млрд АҚШ долларын жұмсаған. Бұл көрсеткіш Ұлттық қор қаражатының шамамен төрттен біріне тең. Мәселен, 2021 жылы импорт көлемі 41,3 млрд доллар болса, 2025 жылы 65 млрд долларға дейін өскен.

Оның айтуынша, Қасым-Жомарт Тоқаев отандық өндірушілерді қолдау және импортқа тәуелділікті азайту мәселесіне тұрақты түрде басымдық беріп келеді. Осы бағытта Мәжіліс комитеті Қазақстан Республикасының Энергетика министрлігімен бірлесіп, ірі мұнай-газ операторларымен жүйелі жұмыс жүргізіп жатыр.

Атап айтқанда, Теңізшевройл, North Caspian Operating Company және Қарашығанақ Петролеум Оперейтинг Б.В. компанияларымен қазақстандық қамтуды арттыру бойынша келіссөздер жүргізілген.

Жүргізілген жұмыстардың нәтижесінде Атырау және Ақтау қалаларында өткен салалық форумдарда отандық өндірушілер мен халықаралық операторлар арасында жалпы құны 1,3 млрд доллар болатын келісімшарттар жасалған. Биыл мұндай үшінші форумды Орал қаласында өткізу жоспарланып отыр.

2025–2029 жылдарға арналған жоспарға сәйкес, ірі компаниялар жергілікті қамтуды арттыруды көздейді. Мәселен:

«Теңізшевройл» 2029 жылға қарай тауарлар бойынша үлесті кемінде 30%-ға жеткізуді жоспарлап отыр; «Қарашығанақ Петролеум Оперейтинг Б.В.» 30% және одан жоғары деңгейге шығуды мақсат етеді; «North Caspian Operating Company» тауарлар мен жұмыстар бойынша көрсеткішті 25–30%-ға дейін ұлғайтуды көздейді.

Депутаттың пікірінше, қазақстандық қамтуды арттыру тек пайыздық өсім ғана емес, сонымен қатар отандық өндірісті дамытуға, жаңа жұмыс орындарын ашуға және экономиканың бәсекеге қабілеттілігін күшейтуге ықпал етеді.