Қазақстан алғаш рет егеменді панда облигацияларын шығарды

26 мамырда Қазақстан Қытайдың қор нарығында юаньмен номинацияланған алғашқы панда-облигацияларын сәтті орналастырды. Орналастыру көлемі 3,4 миллиард юаньды, яғни 500 миллион доллар баламасына жетті. Облигациялардың айналым мерзімі – 3 жыл, купондық мөлшерлемесі – жылдық 1,9 пайыз, деп хабарлады ҚР Қаржы министрлігінің баспасөз қызметі.

26 мамырда Қазақстан Қытайдың қор нарығында юаньмен номинацияланған алғашқы панда-облигацияларын сәтті орналастырды. Орналастыру көлемі 3,4 миллиард юаньды, яғни 500 миллион доллар баламасына жетті. Облигациялардың айналым мерзімі – 3 жыл, купондық мөлшерлемесі – жылдық 1,9 пайыз, деп хабарлады ҚР Қаржы министрлігінің баспасөз қызметі.

Ведомство мәліметінше, өтінімдер кітабын қалыптастыру кезінде облигацияларға сұраныс ұсыныстан 2 есе асып түскен. Министрлік бұл қытайлық институционалдық инвесторлардың Қазақстанның қазіргі экономикалық өсімі мен мемлекеттік борышының төмен деңгейіне деген сенімін көрсететінін атап өтті.

Қаржы министрлігінің ақпаратына сүйенсек, Қазақстан Қытай қор нарығында BBB рейтингі бар елдер арасында ең төмен мөлшерлемемен және AA рейтингі бар елдердің деңгейінде облигация орналастырып, рекорд орнатты.

Министрлік рекордтық төмен купондық мөлшерлеме елде жүргізіліп жатқан фискалдық және салықтық реформалардың, сондай-ақ Мемлекет басшысының бастамасымен жүзеге асырылып жатқан саяси өзгерістердің нәтижесі екенін мәлімдеді. Панда-облигацияларды орналастыру квазимемлекеттік және корпоративтік эмитенттердің алдағы шығарылымдары үшін бағдар белгілеуге мүмкіндік берді.

"Бұл мәміле Қазақстан мен Қытай арасындағы жан-жақты стратегиялық әріптестікті дамытудағы кезекті маңызды белес болды және екіжақты қаржылық-инвестициялық ынтымақтастықтың тереңдей түскенін көрсетеді", – деп атап өтті министрлік.

Панда-облигациялар Бейжің қаржылық активтер биржасында және "Астана" халықаралық қаржы орталығының биржасында листингтен өтеді. Бұл Қазақстан мен Қытай арасындағы қаржылық байланысты одан әрі нығайтуға ықпал етеді.

Ведомство Қаржы министрлігі мемлекеттік қарыз алудың салмақты саясатын жалғастыратынын мәлімдеді. Бұл саясат борыштық портфельді әртараптандыруға, борышқа қызмет көрсету құнын төмендетуге және халықаралық инвесторлардың Қазақстанның егеменді кредиттік профиліне сенімін сақтауға бағытталған.

Министрлік мәліметінше, бұл орналастыру бекітілген мемлекеттік сыртқы қарыз алу бағдарламасы аясында жүзеге асырылған. Қазір мемлекеттік қарыз қауіпсіз әрі басқарылатын деңгейде сақталып отыр: ол белгіленген 32 пайыздық шекті деңгей кезінде ЖІӨ-нің 20 пайыз болды. Қаржы министрлігі бұл әлем елдері арасындағы ең төмен көрсеткіштердің бірі екенін атап өтті.