Қазақстан битуммен толық қамтамасыз етіліп, шетелге экспорттауға дайындап жатыр

Қазақстанда жол құрылысына қажетті битумды Еуразиялық экономикалық одақ шегінен тыс жерлерге шығаруға салынған тыйымды алып тастауы мүмкін. ҚР Энергетика министрлігінің тиісті бұйрық жобасы «Ашық НПА» порталында жарияланды.

Қазір Қазақстаннан бірқатар мұнай өнімдерін ЕАЭО кедендік аумағынан тыс жерлерге шығаруға тыйым салынған. Энергетика министрлігі ЕАЭО ТН ВЭД 2713 20 000 0 коды бар мұнай битумы үшін ерекшелік жасауды ұсынады.

Жобадағы анықтамада жол битумын тұтыну маусымдық сипатқа ие екені айтылған. Жол жұмыстары бәсеңдеген кезеңде отандық кәсіпорындарда өндірістік қуат толық жүктелмей қалады, ал өнімнің бір бөлігі ішкі нарықта сұранысқа ие болмай қалуы мүмкін.

Ведомствоның есебіне сай, экспортқа рұқсат беру маусымаралық кезеңде битумның артық көлемін сатуға және сонымен бірге мұнай өңдеу кәсіпорындарын тұрақты жүктеуді қолдауға мүмкіндік береді.

Жоба Премьер-министр Олжас Бектеновтің 2026 жылғы 23 шілдеде Маңғыстау облысына жасаған жұмыс сапарының қорытындысы бойынша берген тапсырмасын орындау мақсатында дайындалды. Құжат 4 қарашаға дейін көпшілік талқылауда болады.

Экспортты ашу мүмкіндігіне ел ішіндегі өндірістің ұлғаюы алғышарт болды.

Энергетика министрлігінің мәліметінше, Қазақстан бүгінде жол битумына деген ішкі қажеттілікті толық өтеп отыр. Caspi Bitum зауытының қуатын кеңейткеннен кейін кәсіпорында мұнай өңдеу жылына 1 млн тоннадан 1,5 млн тоннаға дейін, ал жол битумын шығару жылына 500 мың тоннадан 750 мың тоннаға дейін артты.

Қазақстанда жиынтық қуаты жылына шамамен 1,6 млн тоннаны құрайтын жол битумын өндіретін төрт кәсіпорын жұмыс істейді. Бұл ретте ішкі нарықтың 2026 жылғы қажеттілігі шамамен 1,1 млн тонна деп бағалануда. Осылайша, қолданыстағы қуаттар ішкі сұранысты өтеуге толық жеткілікті.

Энергетика министрлігі экспорттау мүмкіндігі кәсіпорындарға белсенді жол маусымы аяқталғаннан кейін өндіріс көлемін төмендетпеуге және өнім артығын сыртқы нарықтарда өткізуге көмектеседі деп үміттейді.

Бүгін, 14:49