Қазақстан GISS 2026 симпозиумында авиациядағы жаһандық бастамаларды қолдады

14–16 сәуір аралығында өткен симпозиумға әлемнің әр елінен авиация саласының басшылары, үкімет өкілдері мен халықаралық ұйымдар жиналды. Іс-шараның басты тақырыбы — «Өңірлік шешімдер, жаһандық артықшылықтар» болды.

Қазақстандық делегацияны ҚР Көлік министрлігі Азаматтық авиация комитетінің төрағасы Салтанат Томпиева басқарды. Ол симпозиум барысында Халықаралық азаматтық авиация ұйымының Жаһандық елшілер бағдарламасы аясында сөз сөйлеп, Қазақстанның адам капиталын дамыту бағытындағы тәжірибесін таныстырды.

Фото: Көлік министрлігі

Жоғары деңгейдегі кездесуге ИКАО Кеңесінің Президенті Тошиюки Онума мен ұйымның Бас хатшысы Хуан Карлос Саласар, сондай-ақ халықаралық сарапшылар қатысты.

Фото: Көлік министрлігі

Кездесу барысында авиация саласындағы кадр даярлау, гендерлік теңдік, жастарды тарту және білім беру бағдарламаларын дамыту мәселелері талқыланды.

— Бұл Симпозиум Халықаралық азаматтық авиация ұйымының 2026-2050 жылдарға арналған Ұзақ мерзімді стратегиялық жоспарын іске асырудың бастапқы нүктесі болсын. Барша үшін қауіпсіз, қорғалған және тұрақты әуе көлігін қамтамасыз ету — біздің мақсатымыз әрі ортақ жауапкершілігіміз, — деді симпозиумның ашылуында ИКАО Кеңесінің президенті.

Қазақстан тарапынан ұсынылған бастамалар қатарында авиациялық мамандықтарды дәріптеу, әйелдердің рөлін арттыру және жастарды салаға тарту мәселелері болды. Бүгінде елдің азаматтық авиация саласында 25 мыңға жуық маман жұмыс істейді, олардың 40 пайыздан астамы — әйелдер.

Фото: Көлік министрлігі

Симпозиум аясында Қазақстан өкілдері өңірлік авиациялық қауіпсіздік мәселелеріне арналған панельдік сессияға да қатысты. Онда қауіпсіздікті қадағалау және авиациялық оқиғаларды тергеу бойынша өңірлік ұйымдардың рөлі, сондай-ақ кадр және қаржы ресурстарының тапшылығы сияқты өзекті мәселелер көтерілді.

Салтанат Томпиева өңірлік ынтымақтастықтың тиімділігі нақты практикалық қадамдарға негізделуі тиіс екенін атап өтті. Оның айтуынша, сарапшылармен алмасу, бірлескен аудиттер және техникалық миссиялар мемлекеттерге нақты нәтижелерге жылдам қол жеткізуге мүмкіндік береді.

Фото: Көлік министрлігі

Іс-шара қорытындысы бойынша қатысушылар өңірлік тетіктердің жаһандық авиациялық қауіпсіздік жүйесіндегі маңызы артып келе жатқанын атап өтті. Қазақстан өз кезегінде халықаралық ынтымақтастықты одан әрі дамытуға және қауіпсіз, тұрақты авиациялық жүйені қалыптастыруға дайын екенін растады.

Марракеш қаласында (Марокко) өтіп жатқан ICAO Global Implementation Support Symposium 2026 аясында Қазақстанның авиация әкімшілігі (ҚАӘ) мен ИКАО Training Services Agreement келісімін ұзартуға қол қойды.

Фото: Көлік министрлігі

Бұл қадам ИКАО-мен қолданыстағы келісім аясында 2026 жылы ҚАӘ қызметкерлерін оқыту бағдарламасын іске асыруға бағытталған және авиация мамандарының біліктілігін арттыру мен кәсіби құзыреттіліктерін дамытуға бағытталған виртуалды және аудиториялық оқу курстарынан өтуді көздейді. Осылайша, 2026 жылы келісімді іске асыру аясында оқыту негізгі бағыттар бойынша 23 курсты қамтиды, оның қорытындысы бойынша ИКАО халықаралық сертификаттары табысталады. 

Бұдан бұрын Президент Халықаралық азаматтық авиация туралы конвенцияға қатысты заңға қол қойғанын жаздық.