Қазақстан көлік дәліздерін дамытуға 23 млрд доллардан астам инвестиция салады ЕАДБ

АСТАНА, 28 қазан – Sputnik. Еуразиялық даму банкі "Еуразиялық көлік құрылымы: жобалар обсерваториясы және интерактивті карта" баяндамасын жариялады.

Құжатқа сәйкес, Қазақстан Еуразиялық көлік құрылымын дамытуға инвестициялар көлемі бойынша Еуразиялық өңірдегі 13 мемлекеттің арасында екінші орынды иеленді. Бұл жалпы инвестицияның 10%-ін құрайды. Сондай-ақ республика 44% көлемімен Орталық Азияда бірінші орында тұр.

Қазақстанда барлығы 42 жоба іске асырылуда немесе жоспарланған. Олардың кем дегенде төртеуі трансшекаралық сипатқа ие:

Аягөз – бақты темір жолының және Қазақстан мен Қытай арасындағы үшінші шекара өткелінің құрылысы;

Алматы – Ыстықкөл (Қырғызстан) ақылы автомагистралінің құрылысы;

Жаңаөзен - Кендір - Түрікменстан шекарасы автомагистралінің, "Солтүстік – Оңтүстік" ККМ шығыс бағыты учаскесінің құрылысы;

Дарбаза – Мақтаарал темір жолының және Өзбекстанмен жаңа шекара өткелінің құрылысы.

Автожол секторын дамытуға 16,7 миллиард доллар немесе жалпы көлемнің 71,7%-ін инвестициялау жоспарланып отыр. Теміржол саласына 4,2 миллиард доллар бөлінеді.

Тағы 1,5 миллиард доллар Каспийдегі теңіз порттары мен флотты дамытуға бағытталады. Логистикалық орталықтарды, шекарадан өту пункттерін және әуежайлардың жүк терминалдарын дамыту жобаларына 0,9 миллиард доллар бөлінеді.

"Қазақстан - әлемдегі мұхит порттарынан ең шалғай елдердің бірі. Бұл ретте Қазақстанның сыртқы саудасы, сондай-ақ оның транзиттік ағындарға қызмет көрсетудегі рөлі қарқынды өсіп жатыр. Бұл көлік жүйесін дамытудың сәтті стратегиясының және инвестициялардың едәуір көлемінің арқасында жүзеге асады. "Нұрлы жол" мемлекеттік бағдарламасын іске асырудың бес жылында көлікке 17,9 млрд доллар инвестиция салынды", - деді ЕАДБ бас экономисі Евгений Винокуров.

Қазақстанның мұнымен тоқтап қалмағаны да маңызды, деп жалғастырды ол.

"ЕАДБ жүргізіп жатқан Еуразиялық көлік құрылымы жобалары обсерваториясының деректері бойынша, ел 2035 жылға дейін Шығыс–Батыс және Солтүстік–Оңтүстік бағыттарындағы көлік дәліздерін дамытуға 23 млрд доллардан астам қаражат салуды жоспарлап отыр", - деді Винокуров.

ЕАДБ мәліметінше, Қазақстан Еуразияның көлік қиылысына айналу жолында келе жатыр.