Қазақстан мен ЕО стратегиялық әріптестікті одан әрі кеңейтпекші

Қазақстандық дипломат Еуропалық комиссияның вице-президенті, Одақтың Сыртқы істер және қауіпсіздік саясаты жөніндегі Жоғарғы өкілі Кая Калласпен, Халықаралық әріптестік жөніндегі комиссары Юзеф Сикеламен және Еуропалық Одақтың Орталық Азия бойынша арнайы өкілі Эдвардс Стипрайспен кездесті.

Талқылау барысында тараптар Қазақстан мен Еуропалық Одақ арасындағы өзара сыйлыстық, сенім мен ортақ мүддеге негізделген көп қырлы және қарқынды дамып келе жатқан ынтымақтастық мәселелерін талқылады.

Бұған Қазақстан Республикасы мен Еуропалық Одақ және оған мүше мемлекеттер арасындағы Кеңейтілген әріптестік пен ынтымақтастық туралы келісімді іс жүзінде жүзеге асыру ықпал етіп отыр. Биылғы желтоқсанда 10 жылдығын атап өтетін бұл құжат Қазақстан-Еуропа қарым-қатынасын жаңа деңгейге көтерді.

Келісімде көрсетілген ынтымақтастықтың 29 бағытының ішінде Астана мен Брюссель көлік және логистика, маңызды шикізат ресурстары, жасыл энергия, цифрлық трансформация, ауыл шаруашылығы, білім және ғылым салаларындағы ортақ басымдықтарды көздейтіні баса айтылды.

А.Исетов екіжақты ынтымақтастықты нығайту Орталық Азия елдері мен Еуропалық Одақ арасындағы аймақаралық ынтымақтастықты дамытуға ықпал ететінін атап өтті. Осы тұрғыда үстіміздегі жылдың сәуір айында Самарқандта өткен «Орталық Азия-Еуроодақ» саммитінде қол жеткізілген келісімдерді тиімді жүзеге асыру маңызды.

Сондай-ақ қазақстандық дипломат сұхбаттастарын Президент Қасым-Жомарт Тоқаевтың «Қазақстан жасанды интеллект дәуірінде: цифрлық трансформация арқылы ағымдағы сын-қатерлер және оларды шешу жолдары» атты қыркүйектегі Жолдауында айтылған еліміздегі реформалардың негізгі бағыттарымен таныстырды.

Сондай-ақ тараптар ЕО-ның Орталық Азия бойынша арнайы өкілі Э.Стипрайстың Астанаға алдағы сапарын қоса алғанда, жоғары деңгейлі бірлескен халықаралық іс-шаралардың кестесін қарастырды.

Қазақстанның Бельгиядағы және Люксембургтегі Елшісі Роман Василенко Kazinform тілшісіне берген сұхбатында осы кездесудің қорытындысына кеңінен тоқталды.

-Бұндай бірінші кездесу Люксембургте Еуропалық Одақ, Оңтүстік Кавказ және Орталық Азия елдерінің сыртқы істер министрлері деңгейінде өтті, ол біздің үш аймақ арасындағы байланыс пен көлік байланысын талқылауға арналған. Бұл өте нәтижелі және тиімді болды», - деді ол.

Р.Василенконың айтуынша, Қазақстан қазірдің өзінде инфрақұрылымды дамытуға 35 миллиард доллар инвестиция құйып үлгерді және алдағы бес жылда тағы 15 миллиард доллар құймақшы. Тараптар Орталық Азия, Оңтүстік Кавказ және Еуропа елдерінің «Орталық дәліздің» толық қуатында жұмыс істеуін қамтамасыз ету үшін күш-жігері арасындағы синергияны қамтамасыз ету қажеттілігін талқылады.

-Армения мен Әзербайжан арасындағы қақтығысты шешудегі прогресс Оңтүстік Кавказда Әзербайжан, Армения арқылы және Түркияға өтетін балама жолдың тағы бір маңызды құбырының пайда болуына мүмкіндік ашатыны туралы көп пікірталас болды. Қазақстанның бұл бастаманы қолдайтыны баршаға белгілі және Оңтүстікте табиғи дамуға қолайлы жағдай туғызатын, Оңтүстік Кавказдағы бейбітшілікті қамтамасыз етуге толығымен дайын. Орта дәліздің өткізу қабілеті қазірдің өзінде жылына 6 миллион тонна, бірақ Қазақстан, Әзербайжан, Грузия, Түркия және басқа елдердің инвестициясын ескере отырып, бұл көлем алдағы төрт жылда 10 миллион тоннаға дейін артып, 2029-2030 жылдарға қарай 10-11 миллион тоннаға жетеді деп сенемі,- деді Роман Василенко.

Елші атап өткендей, келіссөздер Қазақстанның сындарлы көзқарасын, сондай-ақ осы бағыттағы барлық серіктестердің үйлестірілген және белсенді түрде жұмыс істеуге мүдделілігін көрсетті.

Осыған дейін ЕО сарапшысының Қазақстанның ЖИ заңын жоғары бағалағаны туралы жаздық.