Қазақстан мен Грузияның заманауи қауіп қатерлерге қарсы күрес саласында ынтымақтастығы нығаяды

Астанада Қазақстан мен Грузияның ішкі істер министрлері Ержан Саденов пен Гела Геладзенің келіссөздері өтті, - деп хабарлайды  Aikyn.kz Polisia.kz ақпаратына сәйкес. Сапар аясында Грузияның ішкі істер министрі Гела Геладзені ел Президенті Қасым-Жомарт Тоқаев қабылдады. Кездесу барысында құқықтық тәртіпті қамтамасыз ету және қылмысқа қарсы іс-қимыл саласындағы екіжақты ынтымақтастықтың өзекті мәселелері талқыланды. Сондай-ақ тараптар екі ел арасындағы серіктестікті одан әрі нығайтуға өзара мүдделі екендерін білдірді.

Салалық ведомстволар арасындағы келіссөздер Қазақстан Ішкі істер министрлігінде жалғасты. Тараптар құқық қорғау органдары арасындағы өзара іс-қимылдың қазіргі жай-күйі мен даму перспективаларын талқылап, ұйымдасқан қылмысқа, есірткі және киберқылмысқа қарсы күрес, қылмыскерлерді іздестіру және экстрадициялау, жедел ақпарат алмасу, заңсыз көші-қонға қарсы іс-қимыл, сондай-ақ ведомстволық білім беру жүйесін дамыту және кадр даярлау бағыттары бойынша практикалық жұмысты тереңдету мәселесін көтерді.
Келіссөздер қорытындысы бойынша Қазақстан мен Грузия Ішкі істер министрліктері арасындағы өзара түсіністік туралы меморандумға қол қойылды. Құжат ведомстволар арасында тәжірибе алмасуға және институционалдық әріптестікті дамытуға бағытталған. Одан бөлек грузин делегациясына қазақстандық полицияның инфрақұрылымы мен заманауи технологиялары таныстырылды. ІІМ Жедел басқару орталығында зияткерлік бейнебақылау жүйелері, талдамалық платформалар, полиция күштерін үйлестірудің заманауи құралдары, сондай-ақ қоғамдық қауіпсіздікті қамтамасыз етуде қолданылатын жаңа техникалар мен цифрлық шешімдер көрсетілді. Грузия тарапы ішкі істер органдарын цифрлық трансформациялау бойынша Қазақстан тәжірибесін зерделеуге қызығушылық танытты. Профильдік бөліністерге барумен қатар делегация Халыққа қызмет көрсету орталығы мен Жасанды интеллект және цифрлық даму министрлігі қызметімен танысты.
Кадр даярлау мәселелеріне де ерекше назар аударылды. Қазақстан ІІМ Басқару академиясында грузин тарапы ведомстволық білім беру және полиция қызметкерлерін кәсіби даярлау жүйесімен танысты. Делегация өздерінде полиция білімін дамыту және академиялық базаны нығайту бағытында жүргізіліп жатқан жұмыстарды атап өтті. Келіссөздер Қазақстан мен Грузия құқық қорғау ведомстволары арасындағы жоғары деңгейдегі кәсіби сенім мен өзара тиімді ынтымақтастықты одан әрі кеңейтуді көздеді.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.