Қазақстан мен Швейцария ветеринария және мал шаруашылығы саласында ынтымақтастықты кеңейтуде

Қазақстан Республикасы Ауыл шаруашылығы министрлігі Ветеринариялық бақылау және қадағалау комитеті Швейцарияның ауыл шаруашылығы өнімдерін экспорттау платформасының директоры, медицина ғылымдарының докторы, ветеринария саласының маманы Дженнифер Саурина ханыммен келіссөздер өткізді. Кездесу жануарлардан алынатын өнімдердің халықаралық сауда рәсімдерін жетілдіру және ведомствоаралық өзара іс-қимылды нығайтуға бағытталды.

Тараптар ветеринариялық қызметтердің бірлескен жұмыс тобын құру, Швейцарияның сүт өнімдерін Қазақстан нарығына экспорттауға мүдделілігі, ірі қара малдың генетикалық материалын әкелу перспективалары, сондай-ақ эпизоотиялық жағдайға байланысты енгізілген уақытша шектеулерді жою бойынша әрі қарайғы іс-шараларды талқылады.

Қазақстан тарапы импортқа қатысты өтінімдерді қарау үшін Швейцарияның уәкілетті органының ресми өтініші, ЕАЭО елдеріне экспорттауды жоспарлап отырған кәсіпорындардың тізімі, сондай-ақ шектеулер сақталып отырған аурулардың жойылғанын растайтын эпизоотиялық ахуал туралы өзекті ақпарат ұсынылуы қажет екенін атап өтті. Бұдан бөлек, бірлескен инспекцияларды жүргізу мерзімдері мен тәртібін айқындау маңызды екені айтылды.

Генетикалық материалды әкелу мәселелері қолданыстағы шектеулер алынып тастағаннан кейін және Еуразиялық экономикалық одақтың ветеринариялық-санитариялық талаптарына сәйкестік расталған жағдайда ғана қаралатын болады.

Швейцария тарапы келіссөздердің конструктивтілігін жоғары бағалап, жетіспейтін құжаттарды жедел түрде жолдауға және Комитетпен техникалық консультацияларды жалғастыруға дайын екендігін білдірді.

Бүгін, 11:36