Қазақстан Милан Кортинада өткен қысқы Паралимпиаданы 2 медальмен қорытындылады

Италияда XIV қысқы Паралимпиадан аяқталды. Милан–Кортинада өткен Паралимпиадаға ұлттық команда екі спорт түрінен 7 спортшымен қатысты. Атап айтқанда, пара биатлон мен пара шаңғы жарысынан Ербол Хамитов, Нұрлан Әлімов, Александр Герлиц, Сергей Усольцев, Юрий Березин, Владислав Кобаль, Анна Грачова  ел намысын қорғады.

Байрақты бәсекеде Ербол Хамитов пара биатлоннан 4,5 км із қуу жарысында тарихи алтын медаль жеңіп алды. Сонымен қатар, ол пара шаңғы жарысынан 1500 м  классикалық спринтте қола жүлдеге ие болды.

«XIV қысқы Паралимпиада өз мәресіне жетті. Қазақстан құрамасы жарысты 1 алтын және 1 қола медальмен аяқтады. Эстафеталық жарыста еліміздің командасы үздік бестікке енді. Бұл нәтижелер – мемлекет тарапынан көрсетіліп жатқан жүйелі қолдау мен параспортты дамытуға бағытталған ортақ жұмыстың жемісі. Дайындық кезеңінде мемлекеттік қолдау аясында спортшыларға жан-жақты жағдай жасалды. Соның ішінде команда дайындығына кешенді медициналық топ тартылып, үздік қысқы базаларда халықаралық оқу-жаттығу жиындары ұйымдастырылды. Сондай-ақ жаттығу процесіне Паралимпиаданың бірнеше дүркін чемпионы, тәжірибелі халықаралық маман Роман Петушков консультант ретінде тартылды. Осындай бірлескен жұмыстың нәтижесінде ұлттық құрама мүшелері жарыстарда жоғары деңгейдегі бәсекеде лайықты өнер көрсетті»,-деді Спорт және дене шынықтыру істері комитетінің басқарма басшысы Марат Қасқырбаев.

Айта кетейік, Милан-Кортина 2026 XIV қысқы Паралимпиада 6-15 наурыз аралығында өтті. Жарысқа 55 елден 600-ден астам спортшы қатысып, пара шаңғы жарысы, пара биатлон, пара хоккей, тау шаңғысы, пара сноуборд және арбадағы керлинг спорт түрлері бойынша 79 медаль жиынтығын сарапқа салды.

Бүгін, 09:10