Қазақстанда 2050 жылы жел мен күннен алынатын энергия үлесі қаншаға жетеді?

Бішкек қаласында Орталық Азия елдерінің әйел-көшбасшылары, сарапшылары және мемлекеттік органдарының өкілдерін біріктірген «Су ресурстары мен энергетика саласындағы әйелдер» атты өңірлік диалог өтті, деп хабарлайды Egemen.kz. 

Кездесудің басты тақырыбы – өңірде климаттық тұрақтылықты қамтамасыз етудегі, су қауіпсіздігі мен энергетикалық көшуді ілгерілетудегі әйелдердің рөлі болды.

Қазақстан атынан форумға ҚР Энергетика министрлігі жаңартылатын энергия көздері департаментінің бас сарапшысы Айнара Айдынқызы қатысты. Өз сөзінде ол энергетика саласындағы әйелдердің кәсіби қауымдастығын нығайтуға бағытталған жұмыстарды атап өтті.

Атап айтқанда, Qazaq Green жанындағы Әділетті энергетикалық көшу жөніндегі әйелдер комитеті мен KazEnergy жанындағы Әйелдер энергетикалық клубының бастамалары көшбасшылықты дамытуға, тәжірибе алмасуға және кәсіби өсімге ықпал ететінін айтты.

Қазақстан энергетикалық көшу үдерісіне әйелдерді кеңінен тарту; кәсіби даму мен мансаптық өсім үшін мүмкіндік жасау; өңіраралық диалог пен ынтымақтастықты кеңейту бағыттарына басымдық береді.

«Қазақстан 2030 жылға қарай ЖЭК үлесін 15%-ға, ал 2050 жылға қарай баламалы көздерді қоса алғанда – 50%-ға жеткізуді мақсат етіп отыр», делінген Энергетика министрлгінің хабарламасында. 

Қазіргі таңда ЖЭК секторында шамамен 2000 маман жұмыс істейді, оның ішінде әйелдердің үлесі тұрақты түрде өсіп келеді. Бұл үрдісті жалғастыру үшін әйелдердің стратегиялық жоспарлауға, жобаларды басқаруға және шешім қабылдауға белсенді қатысуына жағдай жасау маңызды