Қазақстанда жаңартылатын энергия көздерінің үлесі 7 пайызға жуықтады

АСТАНА, 21 қазан — Sputnik. Қазақстанда электр энергиясын өндіру саласында жаңартылатын энергия көздерінің үлесі 7 пайызға жуықтады, деп хабарлайды Energyprom.kz.

Ұлттық статистика бюросы мен Энергетика министрлігінің мәліметі бойынша 2019-2024 жылдар аралығында елімізде жаңартылатын энергия көздері арқылы электр энергиясын өндіру үлесі үш есеге, яғни 1,9%-дан 6,2%-ға дейін өсті.

"2025 жылдың қаңтар-маусым айлары аралығында негізгі "жасыл" индикатор 6,8%-ға дейін өсті", - деп жазды портал.

Қазақстанда жаңартылатын энергия өндірудің өсу қарқыны жалпы энергия көздеріне қарағанда жоғары. 2025 жылдың бірінші жартыжылдығында Қазақстан тұтастай алғанда өткен жылдың сәйкес кезеңімен салыстырғанда электр энергиясын 3,3 пайызға көп өндірді. Сонымен қатар жаңартылатын энергия көздері өткен жылмен салыстырғанда 8,8%-ға көп энергия өндірді: 4,2 млрд кВт/сағ.

Мұндай өсім ең алдымен жел энергиясын өндірудің 12,1%-ға артуы есебінен қол жеткізілді. Жел электр станциялары жаңартылатын энергияны өндірудің жалпы көлемінің ең үлкен үлесін алады: 61,5%. Күн панельдері екінші орында, барлық жасыл электр энергиясының 25% өндіреді.

"2025 жылдың бірінші жартыжылдығында күн электр станциялары өткен жылдың сәйкес кезеңімен салыстырғанда 8,5 пайызға көп энергия өндірді", - деп жазылған сайт ақпаратында.

Жасыл энергетиканың жылдам өсуіне мүмкіндік беретін факторлардың бірі – жаңа нысандарды іске қосу және қуаттылықты арттыру. Мысалы, биылғы жылдың қаңтар-маусым айлары аралығында Қазақстанның жаңартылатын энергия көздері нысандарының жалпы белгіленген қуаты 3,1 ГВт-қа жетті, бұл 2024 жылдың бірінші жартыжылдығымен салыстырғанда 7,5%-ға артық. 2019 жылдың сәйкес кезеңімен салыстырғанда бұл көрсеткіш үш есеге өсті.