Жаңартылатын энергия: Қытайлық инвесторлар жаңа жобалар бастайды

Қазақстанда қытайлық инвесторлардың қатысуымен жаңа энергетикалық жобалар жүзеге асырылмақ.
Бұл туралы Энергетика министрлігінің алқа мәжілісінде Энергетика министрі Ерлан Ақкенженов мәлімдеді.

Оның айтуынша, 2026 жылы жаңартылатын энергия көздері саласында бірқатар жоба іске қосылады. Жалпы қуаты 245,8 МВт болатын 10 жоба жүзеге асыру жоспарланып отыр. Атап айтқанда, қытайлық компаниялар Қазақстан аумағында энергия жинақтау жүйелерімен жабдықталған жел электр станцияларын салмақ.

Сонымен қатар Үкімет инвесторлармен тиісті келісімдерге қол қоюды көздеп отыр. Бұдан бөлек, 2040 жылға дейінгі сутегі энергетикасын дамыту тұжырымдамасын жаңарту және «Баламалы энергия көздері туралы» заңды қабылдау жоспарланған.

Министрдің сөзінше, өткен жылы Қазақстанда алғаш рет ірі қуатты жел станциясын салу бойынша аукцион өткізіліп, Қытай компаниясымен үлкен күн электр станциясын тұрғызу жөнінде келісім жасалған. Бұған дейін министр Қарашығанақ газ өңдеу зауытының жобалық құжаттарын әзірлеу басталғанын да хабарлаған еді.