Қазақстанда арзан авиабилеттерді сату ережелері өзгерді

Қазақстанда әуе рейстерін субсидиялау тәртібі өзгергеннен кейін арзан әуе билеттері жаңа ереже бойынша сатылады, деп хабарлайды Tengri Travel тілшісі.

Не өзгерді?

Үкіметтің қаулысына сәйкес, енді әуе тасымалын субсидиялау ресми түрде жеке кәсіпкерлікті мемлекеттік қолдау шарасы ретінде танылды. Бұл әуекомпанияларға берілетін әрбір төлем бизнесті мемлекеттік қолдаудың арнайы тізіліміне енгізілуі тиіс дегенді білдіреді.

Тізілімді Қаржы министрлігі айқындайтын мемлекеттік тіркеуші жүргізеді.

Бұл ретте әуекомпаниялардың субсидия алуға берген өтінімдерін тексеру екі кезеңнен тұрады:

бірінші кезеңде салалық цифрлық жүйе құжаттардың дұрыс рәсімделуін және толықтығын автоматты түрде тексереді; екінші кезеңде мемлекеттік тіркеушінің ақпараттық жүйесі әуе тасымалдаушының мемлекеттік қолдау алуға белгіленген талаптарға сәйкестігін бағалайды.

Қаражат алу үшін әуе тасымалдаушылары дербес деректерді, сондай-ақ заңмен қорғалатын құпия мәліметтерді жинауға, өңдеуге және беруге келісім беруі тиіс. Тексеріс нәтижесі кәсіпкерлік мәселелері жөніндегі уәкілетті органға тікелей жіберіледі.

Әуе билеттерінің бағасы өзгере ме?

Өзгерістер әуе билеттері құнына әсер етпейді. Жаңа ереже әуекомпанияларға субсидия беру тәртібіне ғана қатысты.

Бұл ретте мемлекет бұрынғыдай тасымалдаушыларға тасымалдаудан түскен табыс пен пайдалану шығыны арасындағы айырмашылықты өтеп береді. Сондай-ақ әуекомпанияларды конкурстық негізде іріктеу, ай сайын 20-сына дейінгі есептілік және 30-зына дейін субсидия аудару тәртібі сақталады.

Тағы оқыңыз: Артық төлемеу үшін билеттерді қай күндері сатып алу керек: сарапшылар кеңесі

Google News арқылы жаңалықтарымызды қадағалаңыз

Жазылу