Қазақстанда карбамид тыңайтқышы өндіріледі

Ауыл шаруашылығындағы ең тиімді тыңайтқыштың бірі енді Қазақстанда өндіріледі.

Осы мақсатта Президент жанындағы Ұлттық ғылым академиясы мен мұнай-газ химия компаниясы арасында меморандумға қол қойылды. Ғалымдар карбамид тыңайтқышының тиімділігін анықтап, елдің төрт өңірінде әртүрлі табиғи климаттық аймақтарда кешенді ғылыми зерттеулер мен өндірістік сынақтар жүргізеді. Тәжірибелер  бидай мен арпаны, жүгеріні, сояны және майлы зығырды қамтиды. Ал азотты карбамид шығарумен Ақтөбе облысында салынатын мұнай-газ химия кешені айналысады. Осылайша мол өнім алуға септігін тигізетін тыңайтқыш - аммиакті селитраны алмастырады. Қазір ғалымдар оның тиімділігін анықтауға кірісті. Осы егіншілік маусымда төрт шаруашылықтың жері 22 тонна азотты карбамидпен тыңайтылды.

Қуантар Әлиханов, ҚР Президенті жанындағы ҰҒА Пәнаралық ғылым орталығының директоры:

- Бұл карбамид тыңайтқыштары өсімдіктердің түрін таңдамайды, бұл - әмбебап, кең ауқымда пайдалануға болатын өнім түрі болып табылады. Сонымен қатар экономикалық тиімділігіне келетін болсақ, аммиакті селитрадан айтарлықтай төмен бағада болады.