Қазақстанда мемлекеттік сатып алу үшін компанияларды “тәжірибелі құрылысшыларға“ айналдырған

Қаржылық мониторинг агенттігі Алматыдағы мемлекеттік сатып алу саласындағы алаяқтық дерегі бойынша тергеуді аяқтады, деп хабарлайды Tengrinews.kz.

Қаржылық мониторинг агенттігі Алматыдағы мемлекеттік сатып алу саласындағы алаяқтық дерегі бойынша тергеуді аяқтады, деп хабарлайды Tengrinews.kz.

Тергеу мәліметтері бойынша, "КазСтройОпыт LTD" ЖШС басшысы консалтингтік қызмет түрінде коммерциялық ұйымдар үшін құрылыс жұмыстарының тәжірибесін жасанды түрде қалыптастыру бойынша қылмыстық схема ұйымдастырған.

"Электрондық депозитарий" жүйесіне орындалған жұмыстар мен нысандарды пайдалануға беру туралы жалған актілер енгізіліп, бұл клиент-компанияларға мемлекеттік сатып алуларға қатысу кезінде негізсіз артықшылықтар берген. Схема әлеуметтік желілер мен интернет-алаңдарда белсенді түрде жарнамаланған", - деп хабарлады ҚМА.

Топ құрамында 11 адам болған. Сондай-ақ жалған жұмыс тәжірибесін растағаны үшін Шымкент қалалық сәулет, қала құрылысы және жер қатынастары басқармасының лауазымды тұлғаларына заңсыз сыйақы беріп отырған делдалдар анықталды.

"Қылмыстық жолмен алынған табыстарды заңдастыру үшін бақылаудағы заңды тұлғалар пайдаланылып, олар арқылы ақшалай қаражат жинақталып, қолма-қол ақшаға айналдырылған. Қылмыстық табыс сомасы 490 миллион теңгеден асты", - делінген хабарламада.

Тергеу барысында жұмыс тәжірибесі туралы жалған растамалар алып, мемлекеттік сатып алуларға қатысқан 56 компания анықталды. Материалдар тексеру жүргізу үшін уәкілетті органдарға жолданған.

Үш күдікті қамауға алынды, сегіз адамға қатысты ешқайда кетпеу және тиісті мінез-құлық туралы қолхат түріндегі бұлтартпау шарасы таңдалған. Қылмыстық іс сотқа жіберілді. ҚР ҚІЖК-нің 201-бабына сәйкес өзге ақпарат жария етуге жатпайды.