Қазақстанда оқулықтар жаңартылып, мектеп стандарттары қайта қаралады

Қазақстанда мектеп оқулықтары мен оқу бағдарламаларының мазмұны жаңартылады, оның ішінде жаңа Конституцияның нормалары мен құндылықтары ескеріледі. Бұл туралы Үкіметте өткен брифингте оқу-ағарту министрі Жұлдыз Сүлейменова мәлімдеді, деп хабарлайды Tengri Education.

Қазақстанда мектеп оқулықтары мен оқу бағдарламаларының мазмұны жаңартылады, оның ішінде жаңа Конституцияның нормалары мен құндылықтары ескеріледі. Бұл туралы Үкіметте өткен брифингте оқу-ағарту министрі Жұлдыз Сүлейменова мәлімдеді, деп хабарлайды Tengri Education.

Шенеуніктің айтуынша, биыл жоспар бойынша 2, 3, 7, 8 және 9-сыныптарға арналған оқулықтар жаңартылады. Сонымен қатар білім мазмұнының өзі де қайта қаралып жатыр.

"Қазір бізде жаңа Конституцияның жаңа нормалары мен құндылықтарына сәйкес білім мазмұнын жаңарту жұмыстары жүріп жатыр", - деді Сүлейменова.

Министр қазіргі уақытта мемлекеттік стандарт қайта қаралып жатқанын нақтылады. Атап айтқанда, "Қазақстан географиясы" пәніне 2 сағат қосу жоспарланған.

Бұдан бөлек, мектеп бағдарламасына жасанды интеллект енгізіледі.

Сүлейменованың айтуынша, 1-ден 4-сыныпқа дейін ЖИ цифрлық сауаттылыққа интеграцияланады. Бұрын бастауыш сыныптарда тек цифрлық сауаттылық болса, енді оған жаңа тақырыптар мен мақсаттар қосылады - барлығы 12 сағат.

5-тен 9-сыныпқа дейін цифрлық сауаттылық пен информатика пәндері де жаңартылады. Бұл пәндерде жаңа тақырыптар, жаңа мақсаттар және бақылау жұмыстарына жаңа тәсілдер пайда болады.

"Қысқаша айтқанда, негізгі өзгерістер осындай болады", - деп толықтырды министр.

Тағы оқыңыз: БЖБ мен ТЖБ-дан бас тарту: мектептерде не өзгереді?

Бұған дейін Оқу-ағарту министрлігі мектеп оқулықтарының жаңартылатынын жариялаған болатын. Ведомство мәліметінше, 2026 жылы 3, 4, 7, 8 және 9-сынып оқулықтары жаңартылуы тиіс. 2027 жылы - 1 және 5-сыныптарға арналған жаңа оқулықтар шығарылып, сондай-ақ 10–11 сыныптардың оқулықтары карталарды, тарихи және әкімшілік материалдарды толық ауыстыру арқылы өзектендірілуі керек. 2028 жылы жаңарту жұмыстары 2 және 6-сыныптарды қамтиды.

Google News арқылы жаңалықтарымызды қадағалаңыз