Қазақстанда сиыр етін экспорттау талаптары жеңілдейді

Ведомство ұсынған жаңа өзгерістер бордақылау ісімен айналысатын шаруалардың жұмысын жеңілдетпек. Атап айтқанда, бұған дейін тек ірі кәсіпорындарға тиесілі болған квоталар енді орта деңгейдегі шаруашылықтарға да қолжетімді болады.

— Бұл жоба отандық тауар өндірушілерді ынталандыру үшін әзірленді. Біз нарыққа жаңа ойыншылардың шығуына жол ашып, экспорттық кедергілерді алып тастауды көздеп отырмыз, — делінген құжатта.

Осы орайда, экспортқа шығарылатын ет көлемі бордақылау алаңының қуаттылығына, яғни ондағы мал басының санына тікелей байланысты болып қала береді. Құжатқа сәйкес, квота мөлшері келесідей тәртіппен бөлінеді:

5 000 басқа дейінгі қуаттылығы бар алаңдар үшін — 1 000 тонна; 10 000 басқа дейінгі қуаттылығы бар алаңдар үшін — 2 000 тонна; 15 000 басқа дейінгі қуаттылығы бар алаңдар үшін — 3 000 тонна; 20 000 басқа дейінгі қуаттылығы бар алаңдар үшін — 4 000 тонна; 50 000 басқа дейінгі қуаттылығы бар алаңдар үшін — 10 000 тонна.

Айта кетейік, бұрын тек өз ет комбинаты барларға ғана басымдық берілсе, енді 5 000-нан астам малы бар бордақылау алаңдары жеке мал соятын цехы болмаса да, өзге кәсіпорындар арқылы өз өнімін шетелге саудалай алады. Сондай-ақ, өз ет комбинаты бар шаруашылықтар үшін мал басының шекті саны 500-ге дейін төмендетілген.

Жалпы квота көлемі 20 мың тонна деңгейінде сақталып, ол 6 ай мерзімге жарамды болады.

Бұған дейін, Kazinform агенттігінің тілшісі қалалардағы ет бағасын салыстырған еді.