Қазақстанда су дипломатиясы департаменті құрылды

Қазақстанда Су дипломатиясы департаменті құрылды. Бұл туралы Су ресурстары және ирригация министрлігі хабарлады, деп жазады Tengrinews.kz.

Жаңа департамент су дипломатиясы саласындағы мемлекеттік саясатты дамыту мен үйлестіруге жауапты болады.

Департамент Қазақстанның трансшекаралық су ресурстары мәселелері бойынша жұмысын үйлестіреді: бұған халықаралық комиссияларға қатысудан бастап, келіссөздер жүргізу мен өзге мемлекеттермен келісімдер жасасуға дейінгі міндеттер кіреді.
Қазақстанның бас су дипломаты болып Данияр Шәріп тағайындалды.

Данияр Есенұлы Шәріп 1992 жылы Алматы облысында дүниеге келген. Әл-Фараби атындағы Қазақ ұлттық университетін "Гидрология" мамандығы бойынша, сондай-ақ Каспий қоғамдық университетін "Құқықтану" мамандығы бойынша тәмамдаған.

Еңбек жолын 2015 жылы Ауыл шаруашылығы министрлігі Су ресурстары комитетінің Су шаруашылығы құрылыстарын пайдалану және дамыту басқармасында сарапшы міндетін атқарушы ретінде бастаған. Кейін сарапшы және бас сарапшы қызметтерін атқарды.

2019 жылы Ауыл шаруашылығы министрлігінің Трансшекаралық өзендер департаменті Трансшекаралық өзендер басқармасының бас сарапшысы болды.

2019-2023 жылдары Экология, геология және табиғи ресурстар министрлігінің Трансшекаралық өзендер департаментінде бас сарапшы, кейін Трансшекаралық өзендер басқармасының басшысы қызметтерін атқарды.

2023-2024 жылдары Қазақстан Республикасы Үкіметі аппаратының бас инспекторы болды.

2024 жылдан бүгінге дейін Су ресурстары және ирригация министрлігінің Халықаралық ынтымақтастық департаменті директорының орынбасары, кейін осы департаменттің директоры қызметін атқарды.

Бұған дейін Қасым-Жомарт Тоқаев Орталық Азия мен көршілес аймақтар ортақ экологиялық сын-қатерлерге тап болғанын айтып, халықаралық ынтымақтастықты нығайтуға шақырған болатын. Президент бірде-бір ел жаһандық сын-қатерлерді өз бетінше еңсере алмайтынын атап өтті.

Google News арқылы жаңалықтарымызды қадағалаңыз