Қазақстанда төлқұжаттың жаңа дизайны дайындалып жатыр: көгілдір түстісін ақылы түрде ауыстырудың қажеті жоқ

Қазақстанда паспорттың жаңа дизайны әзірленіп жатыр. Ішкі істер министрлігі жаңартылған құжат қашан пайда болатынын, қазақстандықтарға қолданыстағы төлқұжаттарын ауыстыру қажет пе екенін және оны рәсімдеу құны қанша болатынын айтып берді, деп хабарлайды Tengri Travel.

Қазақстанда паспорттың жаңа дизайны әзірленіп жатыр. Ішкі істер министрлігі жаңартылған құжат қашан пайда болатынын, қазақстандықтарға қолданыстағы төлқұжаттарын ауыстыру қажет пе екенін және оны рәсімдеу құны қанша болатынын айтып берді, деп хабарлайды Tengri Travel.

Жаңа паспорт туралы әңгіме қайдан шықты?

Былтыр желтоқсанда әлеуметтік желілерде қазақстандық жаңа төлқұжат делінген суреттер тараған болатын. Желі қолданушылары құжат Оңтүстік Корея паспортына ұқсайтынына назар аударып, бұл қызу талқыға түсті.

Tengrinews.kz коллажы

Сол кезде Ішкі істер министрлігі жаңа дизайн расында дайындалып жатқанын, алайда әлеуметтік желілерде тараған суреттердің ресми жобаға қатысы жоқ екенін түсіндірді.

Қазір не белгілі?

Бірнеше айдан кейін ІІМ жаңа дизайн бойынша жұмыстар жалғасып жатқанын растады.

Ведомство қазіргі уақытта Қазақстан азаматының жаңа паспорт макеті әзірленіп жатқанын хабарлады. Бұл жұмыспен ІІМ дизайн саласындағы мамандармен бірлесе айналысып жатыр.

Бұл ретте жұмыстың аяқталу мерзімі әзірге айтылған жоқ, ал құжат эскиздері жарияланбайды.

"Бұл жұмыстардың аяқталуы және соңғы дизайн бекітілгені туралы ақпарат мүдделі тұлғалардың назарына белгіленген тәртіппен жеткізіледі. Әзірлеудің қазіргі кезеңінде Қазақстан Республикасы азаматы төлқұжатының жаңа дизайнының эскиздерін немесе макеттерін ұсыну мүмкін емес, өйткені құжаттың түпкілікті дизайны әлі бекітілген жоқ", - деп хабарлады ІІМ редакцияның ресми сауалына берген жауабында.

Қолданыстағы паспортты ауыстыру керек пе?

Қысқаша айтқанда, жоқ. Сіз өз төлқұжатыңызды мерзімі аяқталғанша пайдалана бере аласыз.

"Төлқұжаттың жаңа дизайны бекітіліп, айналымға енгізілгеннен кейін бұрын берілген төлқұжаттарды міндетті түрде ауыстыру талап етілмейді. Қолданыстағы үлгідегі төлқұжаттар олардың қолданылу мерзімі аяқталғанға дейін заңды күшін сақтайды", - деп толықтырды ІІМ.

Бұл қазақстандықтарға жаңа құжатты арнайы рәсімдеп, ол үшін ақы төлеудің қажеті жоқ екенін білдіреді. Ескі төлқұжат мерзімі өткенше жарамды болып қала береді.

Паспортты рәсімдеу қанша тұрады?

Қазақстанда төлқұжатты рәсімдеу немесе ауыстыру құны беттер санына және өтініш берушінің жасына байланысты. 2026 жылы базалық мемлекеттік баж мөлшері келесідей:

36 бет (ересектер үшін стандартты) - 34 600 теңге (8 АЕК); 48 бет (кеңейтілген) - 51 900 теңге (12 АЕК); 24 бет (16 жасқа дейінгі балалар үшін) - 17 300 теңге (4 АЕК).

Тағы оқыңыз: Қазақстан паспорты әлемдік рейтингте жоғарылады

Google News арқылы жаңалықтарымызды қадағалаңыз

Жазылу