“Куәлікті ауыстырудың қажеті жоқ“ қазақстандықтарға “автомат“ куәлігімен “механиканы“ айдауға рұқсат берілді

Қазақстанның Ішкі істер министрлігі автомобильдерді тіркеу және жүргізуші куәліктерін беру ережелеріне енгізілген өзгерістерді түсіндірді.

Қазақстанның Ішкі істер министрлігі автомобильдерді тіркеу және жүргізуші куәліктерін беру ережелеріне енгізілген өзгерістерді түсіндірді.

Бұған дейін БАҚ-та Қазақстанда көліктерді тіркеу, тексеру және сатып алу-сату мәмілелерін ресімдеу тәртібі толығымен өзгеретіні туралы ақпарат тараған болатын.

Tengri Auto редакциясы қандай өзгерістер шынымен болатынын, ал қайсы қате ақпарат екенін нақтылау үшін ІІМ-ге ресми сауал жолдады.

Ведомство өкілдері мәліметінше, талқыланып жатқан өзгерістердің бір бөлігі іс жүзінде қолданыстағы рәсімдерді өзгертпейді.

ІІМ ережелердің көлік құралдарын қарап-тексеруге қатысты 22-2-тармағына жеке тоқталып өтті. Министрлік көліктерді тексеру тәртібі бұрынғыша қалатынын баса айтты.

"Көлік құралдарын қарап-тексеру тәртібіне қатысты өзгерістер енгізілмейді. Бұл тармақта қолданыстағы тәртіп сақталады, тек "БАЖ" сөзін "БЦҚ" сөзіне ауыстыруға байланысты редакциялық өзгерістер енгізіледі", - деп хабарлады ІІМ.

Сондай-ақ министрлік автокөлікті сатуға байланысты есептен шығару процедурасының түбегейлі өзгеретіні туралы ақпаратты жоққа шығарды.

"Көлік құралын сату кезінде оны мемлекеттік тіркеуден шығарудың қолданыстағы тәртібіне түбегейлі өзгерістер енгізілмейді", - деп түсіндірді ведомство өкілдері 69-3-тармаққа қатысты.

ІІМ түзетулердің едәуір бөлігі техникалық және редакциялық сипатта екенін нақтылады. Атап айтқанда, құжаттарда "ақпараттық жүйелер" сөзі "цифрлық жүйелерге", сондай-ақ "БАЖ" аббревиатурасы "БЦҚ"-ға ауыстырылып жатыр (БАЖ - Біріңғай ақпараттық жүйе, ал БЦҚ - ІІМ-нің Біріңғай цифрлық қызметі немесе Біріңғай цифрлық жүйесі - ред. еск.)

Сонда не өзгереді?

Дегенмен, кейбір нақты өзгерістер бәрібір болады.

Емтиханды автоматты беріліс қорабы бар автокөлікпен тапсырған жүргізушілер үшін шектеу алып тасталады. Түзетулер күшіне енгеннен кейін мұндай жүргізушілер механикалық беріліс қорабы бар автокөліктерді басқара алады.

"Аталған өзгерістер айрықша белгілері бар жүргізуші куәлігіне де қолданылады. Бұл ретте бұрын берілген жүргізуші куәліктерін ауыстыру талап етілмейді", - деп хабарлады ІІМ.

Бұл автокөлік жүргізушілеріне куәлікті ауыстыру үшін қайта жүгінудің немесе қосымша емтихандар тапсырудың қажеті болмайтынын білдіреді.

Сонымен қатар, ережеге "Автокөлік құралдарының бар-жоғы туралы ақпарат беру" мемлекеттік қызметін көрсету тәртібін реттейтін жаңа 7-1-тарау енгізіледі.

Өзгерістерге сәйкес, қазақстандықтар өздеріне тіркелген автокөліктер туралы ақпаратты цифрлық үкімет порталы немесе басқа да цифрлық сервистер арқылы ала алады.

Қажетті құжаттар тапсырылғаннан кейін азаматқа оның атына тіркелген көлік құралдарының бар-жоғы туралы ақпарат беріледі.

Сондай-ақ бұл бұйрықпен тағы үш қызмет көрсету тәртібі ресми түрде регламенттеледі:

автокөлік құралдарының бар-жоғы туралы ақпарат беру; мемлекеттік тіркеу нөмірі белгісінің телнұсқасын беру; транзиттік нөмірлер мен тапсырыспен берілетін мемлекеттік тіркеу нөмірі белгілерін беру.

Министрлік нормалардың күшіне ену мерзімін де нақтылады. "Цифрлық жүйелер" және "БЦҚ" терминдеріне қатысты түзетулер 2026 жылғы 12 шілдеден бастап қолданысқа енгізіледі. Қалған өзгерістер бұйрық алғаш рет ресми жарияланғаннан кейін күнтізбелік он күн өткен соң күшіне енеді (бұйрық 12 мамырда жарияланды).

Google News арқылы жаңалықтарымызды қадағалаңыз

Жазылу