Қазақстанда жыныстық тәрбиені биология сабақтарына енгізуді ұсынуда

Қазақстанда мектептегі биология бағдарламасын қайта қарап, оған 7–9-сынып оқушылары үшін жыныстық тәрбие мен салауатты өмір салты бойынша міндетті модульдерді енгізу ұсынылды. Мұндай депутаттық сауалды Мәжіліс депутаты Ирина Смирнова жолдады, деп хабарлайды Tengri Edu.

Қазақстанда мектептегі биология бағдарламасын қайта қарап, оған 7–9-сынып оқушылары үшін жыныстық тәрбие мен салауатты өмір салты бойынша міндетті модульдерді енгізу ұсынылды. Мұндай депутаттық сауалды Мәжіліс депутаты Ирина Смирнова жолдады, деп хабарлайды Tengri Edu.

Депутаттық сауал премьер-министрдің орынбасары Аида Балаеваның атына жолданды.

Смирнова соңғы жылдары биология орта білім беру жүйесінде "басым пән мәртебесінен айырылып қалғанын" мәлімдеді. Оның айтуынша, пәнге деген қызығушылық, оны оқыту сапасы және түлектердің жаратылыстану-ғылыми сауаттылық деңгейі төмендеп барады.

"Дәл осы биология сабақтарында жаратылыстану-ғылыми дүниетаным негіздері, өз денесі, физиология, анатомия, гигиена, аурулардың алдын алу, вакцинация қажеттілігі және салауатты өмір салты қағидаттары туралы білім қалыптасуы тиіс", - делінген сауалда.

Депутат жасөспірімдер үшін өте маңызды деп санайтын тақырыптарды бөле-жара атап өтті: репродуктивті денсаулық, жыныстық жетілу, қауіпсіз мінез-құлық, инфекциялардың алдын алу және жауапты ата-ана болу.

Смирнованың пікірінше, бүгінде мектептерде бұл мәселелер не еленбейді, не үстірт баяндалады. Ол мұның бір себебі ретінде кейбір мұғалімдердің жыныстық тәрбие, психикалық денсаулық, АИТВ және ЖИТС сияқты нәзік тақырыптарды талқылауға әдістемелік дайындығының төмендігін атады.

Сондай-ақ депутат биология бойынша сағаттардың қысқаруын, зертханалық және практикалық жұмыстардың тапшылығын, сондай-ақ оқулықтардың тым теорияға негізделіп кеткенін айтты.

Осыған байланысты Смирнова оқу жоспарлары мен бағдарламаларын қайта қарауды, 6-сыныптан бастап биология сағаттарын көбейтуді, пәнді оқытуға жүйелі тәсілді қайтаруды және физиология, адам денсаулығы, репродуктивті денсаулық, гигиена, экология мен тұрақты даму блоктарын күшейтуді ұсынды.

Сонымен қатар депутат 7–9-сыныптарға арналған биология курсы аясында жыныстық тәрбие мен салауатты өмір салты бойынша міндетті модульдерді немесе жеке сабақтарды әзірлеуді, сондай-ақ мұғалімдер мен мектеп психологтары үшін нақты әдістемелік ұсынымдар дайындауды ұсынды.

Басқа ұсыныстардың қатарында биология мұғалімдерін қайта даярлау, кабинеттердің жабдықталуын бақылауды күшейту, денсаулық пен экологияға қатысты практикаға бағытталған тапсырмаларды қорытынды аттестаттауға енгізу, сондай-ақ 9 және 11-сыныптардағы емтихандардың тек тест түріндегі форматынан біртіндеп бас тарту бар.

Смирнованың пайымдауынша, бұл шаралар оқушылардың жаратылыстану-ғылыми сауаттылығын арттыруға және олардың өз денсаулығы мен қоршаған ортаға саналы көзқарасын қалыптастыруға көмектеседі.

Қазақстан мектептеріндегі жыныстық тәрбие тақырыбы бірінші рет көтеріліп отырған жоқ. 2012 жылы Мәжілістің бұрынғы депутаты Айткүл Самакова жасөспірімдер арасындағы түсік тастау мен репродуктивті денсаулық мәселелеріне сілтеме жасай отырып, мектептерге сексуалды мінез-құлық туралы сабақ енгізуді ұсынған болатын.

Тағы оқыңыздар: Қазақстан мектептерінде жаңа пән пайда болады

Google News арқылы жаңалықтарымызды қадағалаңыз