Қазақстандағы мектеп формасы: ата аналар енді нені білуі маңызды

Қазақстанда орта білім беру ұйымдарындағы мектеп формасына қойылатын талаптар түсіндірілді. Ата-аналарға киім үлгісін кім анықтайтыны, оны қайдан сатып алуға болатыны және отбасыларға қандай көмек қарастырылғаны айтылды, деп хабарлайды Tengrinews.kz Оқу-ағарту министрлігіне сілтеме жасап.

Мектеп формасы қандай болуы керек?

Ұлдар мен қыздарға арналған мектеп формасы күнделікті, мерекелік және спорттық болып бөлінеді. Оны таңдау кезінде балалардың жас ерекшеліктері, климаттық жағдайлар, сабақ өткізу орны, мектеп ғимаратындағы температуралық режим және қауіпсіздік талаптары ескеріледі.

"Мектеп формасының үлгісін білім беру ұйымы қамқоршылық кеңес, ата-аналар комитеті және мектептің өзін-өзі басқару органдарының қатысуымен анықтайды. Ол жалпымектептік ата-аналар жиналысының хаттамасымен бекітіледі. Мектеп формасына енгізілетін өзгерістер де осы кеңестермен келісу арқылы қабылданады", - деп хабарлады Оқу-ағарту министрлігіндегілер.

Ата-аналар мектеп формасын кез келген сауда желісінен сатып ала алатыны және өндірушіні өздері таңдай алатыны атап өтілді. Бұл ретте білім беру ұйымдарына жекелеген өндірушілерге басымдық беруге тыйым салынады.

Халықтың әлеуметтік осал санаттарына жататын отбасылардың балаларына "Жалпыға бірдей міндетті білім беру" қоры аясында мектеп формасын, аяқ киім мен мектеп керек-жарақтарын сатып алу үшін мемлекеттік қолдау көрсетіледі.

2026/2027 оқу жылы қарсаңында мұндай қолдаумен шамамен 450 мың баланы қамту жоспарланған. Осы мақсаттарға жергілікті бюджеттерде шамамен 23 миллиард теңге қарастырылған.

Мектеп формасы қауіпсіздік талаптарына сай болуы тиіс. Атап айтқанда, оның құрамында жарақат келтіруі мүмкін фурнитура мен аксессуарлар болмауы керек.

Сонымен қатар, білім беру ұйымдарының жарғыларында белгіленген ережелерге сәйкес, оқушылардың мектеп ғимаратында бас киіммен жүруіне жол берілмейді.

Оқу-ағарту министрлігінің түсіндірмесінде Қазақстанның жаңа Конституциясына сәйкес дін мемлекеттен бөлінгені, ал білім беру ұйымдарындағы оқыту мен тәрбиелеу жүйесі зайырлы сипатта екені де атап өтілген.

Міндетті мектеп формасына қойылатын талаптар оны киюге бірыңғай тәсілді қамтамасыз етуге, ата-аналардың оң көзқарасын қалыптастыруға және білім беру ұйымдарының белгіленген ережелерді сақтау үшін жауапкершілігін арттыруға бағытталған.

"Білім туралы" заңға сәйкес, ата-аналар білім беру ұйымының жарғысында белгіленген ережелерді, сондай-ақ міндетті мектеп формасына қойылатын талаптарды сақтауға міндетті.

Тағы оқыңыз: БЖБ мен ТЖБ жойыла ма? Қазақстанда мектеп оқушыларын бағалаудың жаңа ережелері ұсынылды

Google News арқылы жаңалықтарымызды қадағалаңыз