Қазақстанды көріп, қалуға бел байлады бельгиялық азамат домбыра оның өмірін қалай өзгерткенін айтып берді

Лукас 31 жаста. Ол Бельгияның Льеж қаласында тұрған, алайда осыдан үш апта бұрын Алматыға көшіп келді. Мұндай ерекше қадамға оның басты хоббиі - домбыра тарту өнері себеп болған, ол үшін бельгиялық азамат ел ауыстыруға бел байлаған. Tengri Travel-ге берген сұхбатында ол неге Еуропаны Қазақстанға айырбастағанын және Алматыда оны не таңғалдырғанын айтып берді.

Лукас көшуді бұрыннан армандаған, бірақ ол үшін алдымен жұмыс табу қажет болды. Осылайша, бельгиялық азамат Алматыдағы университеттердің біріне оқытушы болып орналасқан.

"Шын мәнінде, мен жұмысты Бельгиядан кетпей тұрып таптым. Университетте француз тілін оқыту мен үшін үлкен мәртебе және маған сенім артқандары үшін оларға өте ризамын", - деді ол.

Көшуге не түрткі болды?

Лукас бұл өнерді толық меңгеру үшін онлайн-сабақтардың жеткіліксіз екенін түсініп, бұл соңғы шешім қабылдауына түрткі болған.

"Бейнебайланыс арқылы оқудың маған аздық ететінін түсіндім. Нағыз кәсіби деңгейде үйрену үшін домбыра өнері бастау алып, дамып жатқан ортада болуым керек еді", - деп ағынан жарылды ол.

Instagram-дағы бұл жазбаны көру

A post shared by Lucas Mommer (@luciusapuleius74)

Сонымен қатар, бельгиялық жігіттің пайымдауынша, туған елінде ол өзін толықтай танытып болған.

"Ересек адам ретінде өсуді жалғастырып, даму үшін маған жаңа белестер мен мүмкіндіктер қажет болды. Бұл үшін Қазақстан нағыз лайықты мекен болып шықты!" - деп бөлісті ол.

Қазақстанда не нәрсе тамсандырды?

Лукас әзірге домбыра үйренуге толықтай кірісе алмай жатыр. Есесіне, ол Алматының табиғатын, жергілікті тағамдарын танып үлгерді және енді қазақ менталитетін түсінуге тырысып жүр.

"Көшіп келу Алматының айналасындағы ғажайып табиғат сұлулығын, сондай-ақ Қазақстанның керемет асхана дәстүрлерін ашуға мүмкіндік берді. Енді мен қазақ менталитетін, әсіресе ұжымдағы қарым-қатынас ерекшеліктерін түсінуге уақыт бөлгім келеді", - деді шетелдік қонақ.

Instagram-дағы бұл жазбаны көру

A post shared by Lucas Mommer (@luciusapuleius74)

Оны, әсіресе, қазақстандықтардың тарих пен үлкендерге деген ерекше құрметі қатты таңғалдырған.

"Мен қазақтардың ата-бабаларына, тарихына және үлкендерге көрсететін ілтипатын жоғары бағалаймын. Өз тамырына осылайша ұқыпты қарайтын ағаш міндетті түрде көкке қарай бой түзейді деп есептеймін", - деді бельгиялық.

Оның пікірінше, Еуропада бәрі басқаша. Онда әркім өз қамын ойлайды, сондықтан Лукас өз туған өңірінде валлон тілінің жойылып бара жатқанына өкінеді.

"Еуропада ұлттық бірегейлікпен байланысты қарым-қатынас өте күрделі сипат алды, бірақ Қазақстанға келу маған тұтас бір ұлтпен байланысты сезіну қажеттілігін ұғындырды. Менің елім Бельгияға өзіне байыппен қарау әрқашан қиынға соғатын: бізде өзіндік ерекше әзіл-оспақ пен иронияға бейімділік дамыған. Мен өз өңірімнің тілі - валлон тілінің жоғалып бара жатқанына қатты өкінемін", - деп мойындады ол.

Алайда жергілікті тұрғындарды көрген соң, бельгиялық азамат қандай қоғамның мүшесі болғысы келетінін түсінген.

"Адамдардың ұлттық киімдерін, жомарттығы мен қонақжайлылығын, бала тәрбиесіне деген зор ықыласын және қазақтардың өз тілін ілгерілетудегі қайтпас қайсарлығын көргенде: "Міне, мен өзімді мақтанышпен байланыстыра алатын халық", - деп ойладым", - деді Лукас.

Алматының Бельгия қалаларынан айырмашылығы неде?

Шетелдіктің айтуынша, Алматыда ол өзін еркін сезінеді: қала инфрақұрылымы адамды "қыспайтындай" етіп жасалған, ал дүкендер кеш батқанға дейін жұмыс істейді.

"Көшелері кең, балалар ойынына арналған инфрақұрылым көп. Әр аудан шағын дербес қалаға ұқсайды және дүкендердің осыншама кеш уақытқа дейін жұмыс істегені өте ыңғайлы. Бельгияда бәрі кешкі сағат 18:00-де жабылып қалады. Меніңше, Еуропаға саяхаттайтын қазақтар үшін бұл мәдени шок болар еді!" - дейді ол.

Instagram-дағы бұл жазбаны көру

A post shared by Бахтияр Манатұлы | DOMBYRA PLAYER (@bakhtiyar_amanbay)

Цифрлық қолжетімділік те жағымды жаңалық болған: кез келген жерде, соның ішінде қоғамдық көлікте QR-код арқылы оңай төлем жасау мүмкіндігі. Бірақ бельгиялықты бәрінен де таңғалдырған нәрсе - жасыл желектің көптігі.

"Алматы - сондай жасыл қала! Барлық жерден құстардың дауысын есту және ағаштардың астындағы таза ауаны сезіну - бұл өміріңді мүлдем өзгертеді. Менің туған қаламда негізінен бетон басым, ал аптап мүлдем басқаша сезіледі", - деп бөлісті ол.

Менталитет, мәдени ерекшеліктер және жергілікті әдеттер туралы

Қазақстандықтар мен бельгиялықтардың менталитеті мүлдем бөлек. Сондықтан Лукасқа жергілікті тұрмыс-салтқа әлі де үйрену керек, ал кейбір әрекеттері үшін ол ескерту алып та үлгерген. Мысалы, үй ішінде ысқыру немесе көпшілік орындарда мұрын тарту сияқты әдеттер үшін.

"Біздің бельгиялық әзіл-қалжыңымызды сағынатын шығармын немесе қазақ әзілін әлі де тереңірек түсінуім керек. Менде кез келген жағдайда "рахмет" айта беретін шетелдіктерге тән әдет бар. Сондай-ақ, қызықты мәдени айырмашылықтарға тап болдым: бұл жерде үй ішінде ысқыру немесе адамдардың көзінше майлыққа сіңбіру қабылданбайды екен. Еуропада бұған ешкім мән де бермейді", - деді Лукас.

Instagram-дағы бұл жазбаны көру

A post shared by Lucas Mommer (@luciusapuleius74)

Бельгиялықтың айтуынша, Қазақстандағы қонақжайлылық мүлдем бөлек деңгейде.

"Досым Бахтияр мен оның әйелі мені өте жылы қарсы алды: пәтер табуға көмектесіп, алғашқы рет еттен дәм татқызды. Енді мен де осы әдетті бойыма сіңіріп, қонақжайлылықтың шебері болғым келеді", - деді Лукас.

Оны жергілікті тұрғындардың сырт келбеті мен киім киінісі де таңғалдырған.

"Мұндағы адамдар негізінен ұстамды киінеді. Ал мен ашық түсті киімдерге үйренгенмін, өйткені Бельгияның сұрқай ауа райында ашық түстер болмаса, депрессияға түсуің әбден мүмкін! Сондай-ақ сырт келбеттегі алуан түрлілікті көремін деп еш ойламадым. Неге екенін білмеймін, бәрі тек азиялық келбетте болады деп ойлаппын, бірақ мұнда көк көзді аққұба жандарды кездестіру - үйреншікті жағдай екен", - деп бөлісті шетелдік азамат.

Ол үшін басты сынақ - жеке кеңістік туралы түсініктердің айырмашылығы болмақ.

"Бельгияда жеке кеңістік пен оңаша қалуды қатты бағалайды. Ал мұнда қазақ халқының көзқарасы басқаша екенін түсіндім: ұжым мүддесі бәрінен биік. Міне, осыған әлі үйренуім керек", - деп ағынан жарылды ол.

Көлік кептелісі, көне сәулет өнерінің аздығы және ХҚКО-лардағы тілдік кедергілер сияқты қиындықтарға қарамастан, Алматының асқақ таулары мен Бельгияда кездесе бермейтін жабайы табиғатының қасында барлық тұрмыстық қолайсыздықтар ысырылып қалады.

"Көшеден немесе терезеден тауларды көрген сайын, сол көріністің ғажайыптығынан тынысым тарылып, таңданысымды жасыра алмаймын. Оның үстіне қаладан тауға жету өте оңай! Бельгияда мұндай жабайы табиғат қалмаған: 10 минут жүрсең болды, міндетті түрде тұрғын ауданнан шығасың", - дейді ол.

Бельгияға оралу жоспарда бар ма?

Лукастың қайтар билеті жоқ және оны алуды жоспарлап та отырған жоқ: ол қазақ тілін, музыкасы мен мәдениетін толық меңгергенше Қазақстанда тұруға ниетті. Отанындағы достарына еш ойланбастан чемодандарын жинауға кеңес береді - ең болмаса балалар үшін жайлы атмосфера, дәстүрлердің таңғажайып үндестігі мен кәсіпкерлерге берілген үлкен еркіндік үшін келуге тұрарлық дейді.

Ал оны мұнда ұстап тұрған ең басты нәрсе - Қазақстан табиғатының кеңдігі мен сұлулығы.

"Қазақстан ұсына алатын барлық табиғи сұлулықты ашу үшін маған бір өмір жетпейтін шығар деп ойлаймын", - деп түйіндеді Лукас.

Тағы оқыңыз: “Бәрі дұрыс екеніне көз жеткізгісі келеді: Нидерланд блогері Қазақстан несімен таңғалдырғанын айтты

Бізді Google-дың негізгі дереккөздер тізіміне қосыңыз

Қосу