Қазақстандықтарға салық қызметінен маңызды хабарламалар келеді

Жақын арада қазақстандықтарға есептелген мүлік салығы туралы хабарлама келе бастайды. Дегенмен, қымбат жылжымайтын мүлік иелеріне "сән-салтанат салығын" дәзірге төлеудің қажеті жоқ, деп хабарлайды Tengrinews.kz тілшісі Мемлекеттік кірістер комитетіне сілтеме жасап.

Жақын арада қазақстандықтарға есептелген мүлік салығы туралы хабарлама келе бастайды. Дегенмен, қымбат жылжымайтын мүлік иелеріне "сән-салтанат салығын" дәзірге төлеудің қажеті жоқ, деп хабарлайды Tengrinews.kz тілшісі Мемлекеттік кірістер комитетіне сілтеме жасап.

Салық есептеліп жатыр: меншік иелері нені білуі керек?

МКК Өндірістік емес төлемдерді әкімшілендіру басқармасының басшысы Гүлмира Смағұлованың айтуынша, есептелген сомалар салық төлеушілердің жеке шоттарына жүктеліп жатыр.

"Көптеген салық төлеуші жақын арада хабарлама алады. Біз алдағы төлемдердегі есептік соманы алдын ала ұсынамыз. Оларды банк қосымшаларынан және e-Salyq Azamat қосымшасынан көре аласыздар", - деді Смағұлова брифингте.

Бұл ретте МКК мүлік салығын 1 қазанға дейін төлеу керек екенін еске салды.

Егер төлем уақытылы жасалмаса, берешек пайда болып, өсімпұл есептеле бастайды. Төлеу мерзімі өткеннен кейін 20 күн ішінде салық төлеушіге қарыз туралы хабарлама жіберіледі. Содан кейін оған берешекті өтеу үшін бір ай уақыт беріледі.

Егер қарыз бәрібір төленбесе, фискалдық органдар салық бұйрығын шығарып, оны салық төлеушінің кабинеті немесе eGov арқылы жолдайды. Осыдан кейін азаматтың төлем жасау үшін тағы бес жұмыс күні болады.

Өтйпеген жағдайда құжаттар мәжбүрлі түрде өндіріп алу үшін жеке сот орындаушыларына беріледі.

"Егер салықтық берешек сомасы 20 АЕК-тен (2026 жылы 86 500 теңге) аз болса, атқарушылық іс жүргізудің жеңілдетілген тәртібі қолданылады. Мұндай жағдайларда банктік шоттар бұғатталып, мүлікке билік етуге шектеу қойылуы мүмкін", - деп түсіндірді Гүлмира Смағұлова.

Қымбат тұрғын үй иелері нені білуі керек?

Сондай-ақ МКК өкілі халық арасында "сән-салтанат салығы" аталып жүрген қымбат жылжымайтын мүлікке қатысты жаңа нормаларды түсіндірді

Бұл нормалар жаңа Салық кодексімен бірге 2026 жылдан бастап күшіне енгеніне қарамастан, биыл элиталық тұрғын үй иелеріне жоғарылатылған салық төлеудің қажеті болмайды.

Мәселе мынада: Қазақстанда мүлік салығы былтырғы жылдың қорытындысы бойынша төленеді. Сондықтан жаңа ережелер алғаш рет 2026 жылғы салықты есептеу кезінде қолданылады, ал оны тек 2027 жылы төлеу керек болады.

Жоғарылатылған салық салу жалпы құны 450 миллион теңгеден асатын жылжымайтын мүлікке қатысты болады. Егер құны тура 450 миллион теңге болса, жаңа нормалар қолданылмайды.

Бұл ретте есептеу үшін тұрғын үйдің нарықтық бағасы пайдаланылмайды.

Құнын арнайы әдістеме бойынша "Азаматтарға арналған үкімет" мемлекеттік корпорациясы айқындайды. Әдістеме шаршы метрдің базалық құнын, қабырға материалы түрін, ғимарат қабаттылығын, оның орналасқан жерін, инфрақұрылымның даму деңгейін және басқа да коэффициенттерді ескереді.

"Көптеген адам тұрғын үй бағасының өсуіне байланысты осы нормаларға ілініп қаламыз ба деп алаңдайды. Бірақ салық салу үшін жылжымайтын мүліктің нарықтық құны емес, белгіленген әдістеме бойынша айқындалған құны алынады", - деп түсіндірді басқарма басшысы.

Осылайша, қазақстандықтар биыл алатын хабарламалар қарапайым мүлік салығына қатысты болады. Қымбат жылжымайтын мүлік салығы алғаш рет тек 2027 жылы 2026 жылдың қорытындысы бойынша есептеледі.

Жаңа Салық кодексі бойынша не үшін көбірек төлеуге тура келеді?

Еске сала кетейік, жаңа Салық кодексінде қосымша төлемдер қарастырылған сән-салтанат заттарына құны 24 мың АЕК-тен (шамамен 103,8 миллион теңге) асатын қымбат яхталар мен ұшақтар, сондай-ақ белгіленген нормадан тыс әкелінетін литріне 500 мың теңгеден асатын элиталық алкоголь немесе данасы 10 мың теңгеден асатын сигаралар жатады. Мұндай тауарлар үшін құнының 10 пайызы мөлшерінде акциз қарастырылған. Бжұл ретте Қазақстанда бөлек "сән-салтанат салығы" енгізілген жоқ - мәселе қымбат мүліктің жекелеген түрлеріне жоғарылатылған салық салу туралы болып отыр.

Бұған дейін биылдан бастап күшіне енген жаңа Салық кодексінде белгілі бір қымбат тауарлар мен мүлікке жоғарылатылған салық салу қарастырылғаны туралы хабарланған болатын.

Тікелей салықтың орнына сән-салтанат заттарына жоғарылатылған акциздер жүйесіне көшу салық жүктемесін әділетті бөлу үшін ұсынылды. Министрлік өкілдері мұндай тәсіл салық салу объектілерін нақты анықтауға және адал салық төлеушілер үшін жағымсыз салдарды болдырмауға мүмкіндік беретінін түсіндірді.