Қазақстаннан АҚШ қа тікелей рейс қашан іске қосылады? Жаңа мәліметтер белгілі болды

Қазақстанда АҚШ-тың Федералды авиация басқармасы (FAA) жүргізетін IASA Халықаралық ұшу қауіпсіздігін бағалау басталды. Оның нәтижелері Қазақстан мен АҚШ арасында тікелей әуе қатынасын ашу мүмкіндігінің негізгі кезеңдерінің бірі болмақ, деп хабарлайды Tengri Travel.

Қазақстанда не тексеріледі?

Көлік министрлігі Азаматтық авиация комитетінің мәліметінше, тексеру 21-25 қыркүйек аралығында өтеді. FAA сарапшылары Қазақстанның ұшу қауіпсіздігін қадағалау жөніндегі мемлекеттік жүйесін, соның ішінде авиациялық заңнама мен қосалқы нормативтік құқықтық актілерді зерттейді.

Сондай-ақ авиациялық биліктің ИКАО-ның ұшу қауіпсіздігін мемлекеттік бақылау жүйесінің сегіз маңызды элементіне сәйкес тиімді бақылауды жүзеге асыру қабілеті бағаланады.

Тексеру авиациялық персоналды лицензиялау, әуе кемелерінің ұшуға жарамдылығы және ұшу пайдалануы мәселелерін қамтиды.

24 қыркүйекте FAA командасы Астанадағы Air Astana әуекомпаниясына техникалық сапармен барады. Тасымалдаушы бұған дейін АҚШ Көлік министрлігіне (DOT) коммерциялық қызметті жүзеге асыруға рұқсат алу үшін өтінім берген болатын.

Көлік министрлігі бұл сапардың мақсаты ашықтықты қамтамасыз ету аясында Қазақстанның Авиациялық әкімшілігінен алынған ақпаратты растау екенін нақтылады. Сонымен қатар бұл Air Astana-ны пайдаланушы сертификатының иегері ретінде инспекциялау емес.

International Aviation Safety Assessment (IASA) бағдарламасы аясында АҚШ-тың Федералды авиация басқармасы басқа мемлекеттердің авиациялық билігінің ИКАО стандарттарына сәйкес азаматтық авиация қауіпсіздігін мемлекеттік қадағалауды қамтамасыз ету қабілетін бағалайды.

Бағалау нәтижелері бойынша FAA мемлекетке екі санаттың бірін береді. Category 1 (CAT 1) алған жағдайда мемлекеттік қадағалау жүйесі қолданыстағы ИКАО стандарттарына сәйкес деп танылады. Бұл тиісті мемлекеттің әуекомпанияларына АҚШ-қа ұшуды бастау үшін қажетті процедуралардан өтуге, сондай-ақ америкалық тасымалдаушылармен code-share келісімдеріне қатысуға мүмкіндік береді. Сонымен қатар, CAT 1 санатының өзі АҚШ-қа рейстерді орындауға рұқсат саналмайды – әуекомпаниялар америкалық заңнамада көзделген басқа да процедуралардан өтуі тиіс.

Осылайша, қазіргі бағалау Қазақстанның АҚШ-пен тікелей әуе қатынасын ашу жөніндегі жұмысындағы маңызды кезең саналады.

Көлік министрлігі ақпаратынша, 2026 жылғы бағалау Қазақстанның америкалық тараппен бұған дейінгі жұмысының жалғасы болды. 2024 жылғы 26-30 тамыз аралығында елде IASA-ның алдын ала техникалық шолуы жүргізілген болатын. Одан кейін FAA-мен өзара іс-қимыл қазіргі бағалауға дайындық шеңберінде жалғасты.

Нью-Йоркке тікелей рейс бірнеше жылдан бері талқыланып келеді. 2023 жылдың мамыр айында Астанадағы үкімет кулуарында журналистер Air Astana өкілі Питер Фостерден Нью-Йоркке рейс қашан ашылады деп сұраған болатын. Сол кезде ол 2025 жылға жоспарланып отырғанын атап өткен. Рейстерді Алматыдан ашу көзделген еді.

2024 жылдың шілдесінде Цифрлық даму, инновациялар және аэроғарыш өнеркәсібі министрлігінің өкілдері Boeing компаниясының өкілдерімен кездесу өткізгені хабарланды. Қазақстандық делегация Сиэтлде (АҚШ) болып, Boeing ұшақтарын құрастырудың өндірістік процесімен танысты.

2024 жылғы тамызда көлік вице-министрі Талғат Ластаев Қазақстаннан Нью-Йоркке тікелей рейсті қашан ашу жоспарланып отырғаны туралы сұраққа жауап берді. Сол кезде ол Air Astana әуекомпаниясының екі Boeing және екі Dreamliner ұшағын алуға келісімшартқа отырғанын мәлімдеді.

2024 жылдың қазан айында АҚШ-қа тікелей рейстерді ашу талаптарының бірі – екі ел арасында тікелей қонусыз ұшуды орындай алатын ұшақтың болуы екенін білдік. Сол кезде алғашқы әуе кемесі (Boeing 787 Dreamliner) 2025 жылдың соңында Air Astana әуекомпаниясының иелігіне түседі деп күтілген болатын.

2025 жылдың мамырында Қазақстан мен АҚШ арасында әуе қатынасын ашу бойынша жұмыстар жалғасып жатқаны хабарланды. Тікелей рейстерді ашу үшін еліміз бен АҚШ үкіметтері арасында келісімге қол қойылды. Ол "ашық аспан" принциптеріне негізделген, яғни әуекомпаниялар рейстер саны, бағыттар мен тасымалдаушылар бойынша шектеусіз ұша алады.

"Өз кезегінде, тікелей әуе қатынасын ашу мақсатында Air Astana әуекомпаниясына Boeing типті әуе кемесінің жеткізілуі талап етіледі. Әуе кемелерін жеткізу мерзімдері дайындаушы зауытқа байланысты. Дайындаушы зауыт алғашқы әуе кемесін жеткізу мерзімін 2026 жылдың шілдесіне ауыстырды", - деп хабарлады бізге сол кезде Көлік министрлігі.

Осылайша, АҚШ-қа рейстің нақты ашылу күні әлі белгісіз.

Бұған дейін Астанадан Лондон, Париж, Рим және Венаға тікелей рейстер 2027 жылы ашылуы мүмкін екені хабарланған болатын. Мұндай тапсырманы үкімет отырысында премьер-министр Олжас Бектенов берді.

Бізді Google-дың негізгі дереккөздер тізіміне қосыңыз