Қазақтың Ақбас сиырының генетикалық қоры зерттеледі

Қазақстан мен Ресей асыл тұқымды мал шаруашылығы саласындағы ынтымақтастықты нығайтуда. Қазақтың ақбас тұқымының генетикалық қорын зерттеу мақсатында келіссөздер жүргізілуде.

Заманауи ДНҚ-технологияларын пайдаланатын ресейлік ғылыми орталықтар және ұйымдармен бірлескен жұмыс жоспарлануда. Бұл туралы Қазақтың ақбас тұқымы республикалық палатасының атқарушы директоры Бахтияр Өтелбаев айтты. Биыл тұқымның ресми танылғанына 75 жыл. Бұдан бөлек екі елдің салалық қауымдастықтары арасында ынтымақтастық және тәжірибе алмасу туралы меморандум бекіген. Осы сынды бірлескен жобалар 11–12 қараша күндері Орал қаласында өтетін Ресей мен Қазақстанның XXI өңіраралық ынтымақтастық форумында талқыланатын болады.

Бақтияр Өтелбаев, Қазақ Ақбас тұқымы республикалық палатасының атқарушы директоры:

- Қазақ Ақбас тұқымын таңдау себебін түсіндіріп айта кетсек, бұл біздің ата-бабамыздан келе жатқан өңірлерде Ресей мен Қазақстанда көп таралған ірі қара мал тұқымдарының бірі болып саналады. Бүгінгі таңда жоспар бойынша геномдық анализ жасау, жұмысқа кірісеміз. Ол үлкен жобаның бастамасы деп айтуға болады.

Ресей мен Қазақстанның XXI Өңіраралық ынтымақтастық форумында аграрлық ғылым мен бірлескен зерттеулерге ерекше назар аударылады. Қазақстанның Ұлттық аграрлық ғылыми-білім беру орталығы селекция, тұқым шаруашылығы және өсімдік түрлерін экологиялық сынақтан өткізу бағыттарындағы бастамаларын ұсынбақ. Ресейлік ғылыми институттармен көпжылдық ынтымақтастық нәтижесінде мемлекеттік тізілімге 300-ден астам сорт енгізілді.