Қазір мектепке барып жүр: екі аяғынан айырылған Алуаның жағдайы белгілі болды

Астана қаласы әкімі Жеңіс Қасымбек екі аяғынан айырылған Алуаның отбасына уәде етілген баспана берілгенін айтты, - деп хабарлайды Aikyn.kz.

Естеріңізде болса, оқиға маусым айының басында Астанада болған.  Республика даңғылының бойында қала ішінде жүретін жолаушылар автобусы жол апатына ұшырады. 8 жасар Алуа Бекен маусым айының басында Астанада болған автобус апатының салдарынан екі аяғына ампутация жасалған болатын. 

Айтуынша, қала әкімі Алуаның отбасымен жеке өзі кездескен. Ол бұл туралы брифингте хабарлады. 

- Әкімдік барлық медициналық көмек көрсетті. №1 автобус паркі жәбірленушінің отбасына шамамен 20 млн теңге төледі. Сондай-ақ қаладағы демеушілер де қосымша қаражат берген. Уәде берілген пәтер де берілді. Қазір пәтерде жөндеу жұмыстары басталды. Әкімдік қазір Алуа қызымыз отбасымен бірге тұрып жатқан үйді жалдау ақысын төлеп беріп отыр. Бала қазір мектепке барып жүр. Білім ордасы да бәрін түсініп, тиісті көмек көрсетуде, - деді әкім брифингте.