​ҚМГ Солтүстік Өзен учаскесінде іздеу ұңғымасын бұрғылауға кірісті

«ҚазМұнайГаз» ҰК АҚ (ҚМГ) Солтүстік Өзен учаскесінде алғашқы іздеу ұңғымасын бұрғылауға кірісті.

Биыл маусым айында ҚМГ Маңғыстау өңіріндегі күрделі жоба бойынша жер қойнауын пайдалануға келісімшарт алған болатын. Келісімшартта көрсетілген минималды жұмыс бағдарламасы бойынша тереңдігі 2000 және 1650 метр болатын екі іздеу ұңғымасы бұрғыланады.

Жобаның операторы – «KMG Barlau» ЖШС. Бұдан бұрын ҚМГ-ның бұл еншілес компаниясы жер қойнауын геологиялық зерттеу аясында Солтүстік Өзен жобасы бойынша 400 шаршы км толық көлемде 3D заманауи сейсмикалық барлау жұмыстарын орындады.

Алғашқы іздеу ұңғымасы жобаны іске асырудың негізгі кезеңі болмақ, оның нәтижелері учаскенің геологиялық құрылымын нақтылауға және мұнай-газ қоры перспективаларын растауға мүмкіндік береді. 

ҚМГ геологиялық барлау жұмыстарын өз күшімен белсенді жүргізіп жатқанын айта кеткен жөн. Бұдан бұрын компания Қызылорда облысындағы Торғай Палеозой (5585м) учаскесі бойынша алғашқы терең іздеу ұңғымасын бұрғылады, сондай-ақ Ақтөбе облысындағы Қаражар (3250м) учаскесінде бұрғылау жұмыстарын аяқтады.

ҚазМұнайГаздың жаңа геологиялық барлау жобаларына қатысты стратегиясы еліміздің ресурс қорын молайтуға, өңірлердің әлеуметтік-экономикалық дамуын ынталандыруға, сондай-ақ отандық мұнай-газ саласын ілгерілетуге бағытталған.

Сонымен қатар ҚМГ әлемдік инвесторларды тарта отырып Қазақстанда геологиялық барлау саласын дамытуда.

Жалпы, қазіргі уақытта ҚазМұнайГаз Маңғыстау, Ақтөбе, Батыс Қазақстан, Атырау және Қызылорда облыстарында толық ауқымды геологиялық барлау зерттеу жұмыстарын жүргізіп жатыр. ҚМГ жер қойнауын геологиялық зерттеу аясында жүргізген өңірлік зерттеулер, алаптардың цифрлық үлгілерін жасау, перспективті барлау учаскелерін анықтау және табысты алдын ала сейсмикалық жұмыстар бұл бағытты ілгерілетуге негіз болды.

Бүгін, 09:57