Қонақ үйлерге жұлдыз беру тәртібі өзгереді

Биыл елдегі қонақ үйлер 268 млрд теңгеге қызмет көрсетті. Бұл былтырғыдан 20 пайызға көп.

Онда көбіне шетелдік меймандар тұрақтаған. Алайда олардың талабы жоғары. Қызмет көрсету сапасына баса мән береді. Біздегі қонақ жайлар бұл үдеден шығып жатыр ма? 

Елде қонақ үй саны артып келеді. Алайда санаты барының да саптан шығып қалатыны жиілеген. Өйткені қызмет көрсету сапасы ақсайды. Қазір 4 жарым мыңға жуық орналастыру орны бар. Оның 3 пайызы ғана «жұлдызды» атанған.

Halyk Finance сарапшылары:                          

- Қазіргі динамика тек ресми қонақ үйлер санының азаюын ғана емес, сонымен қатар көбіне сертификаттаудан өтпеген немесе ресми жіктеуге ұмтылмайтын бюджеттік, шағын қонақүйлер сегментінің өсуін көрсетеді. Қонақ үйлерді санаттауды тежейтін факторлар: санат алу құны, иелері арасында қонақүй бизнесі стандарттары туралы кәсіби білімнің жетіспеуі, сондай-ақ санатты растау үшін ынталандырудың және міндетті сертификаттау мен санаттауға қатысты заңнамалық талаптың болмауы болуы мүмкін. Бұл қызмет көрсету сапасы мен сектордың бәсекеге қабілеттілігін арттыруды тежейді, туристерге сенімді орналастыру нысандарын таңдауды қиындатады және отандық туристік өнімге деген сенімді төмендетеді.

«Біздегі қонақ үйлердің әлеуетін «Сапа белгісі» мемлекеттік бағдарламасы  анықтайды. Үдеден шыққандардың көбі Астана, Алматы, Ақтау, Түркістан, Шымкент қалалары мен Бурабайда шоғырланған. Нарықта жүзден аса 3-4-5 жұлдызды қонақ үй бар. Енді олардың қатары сиреуі де мүмкін. Өйткені «жұлдыз» беру тәртібі өзгереді. 2008 жылы қолданысқа енген жүйе ескірді» - дейді мамандар.

Маржан Трайыспаева, «Kazakh Tourism» ҰҚ» АҚ департаментінің директоры:

- Жұлдыз санатын алу ерікті түрде жүргізіледі. Оны алу үшін қонақ үй арнайы аккредиттеуден өткен компанияларға жүгініп, оларға өтінім беру керек. Одан кейін сол жерден сарапшылар келіп, сервистің бәрін бағалап, жұлдыздың берілу, берілмеуі туралы шешім шығарады. Осындай жүйе қазір жұмыс істеп тұр. Бірақ кейбір талаптары ескіріп, халықаралық тәжірибеге онша сәйкес келмейді. Сол үшін Азия даму банкімен бірігіп, жаңа жүйені енгізу бойынша ұсыныстар дайындадық.

Жаңа жүйе аясында қызмет сапасын арттырып, бағалау рәсімдерінің ашықтығын қамтамасыз ету көзделеді. Ұсыныс қабылданса, жұлдыз беру міндетін «Қазақ туризм» ұлттық компаниясы атқарады. Елдегі орналастыру орындарының қызметін пайдаланғандардың 14 пайызға жуығы шетелдіктер. Олар мейманхана сапасының санатына сай болуын қалайды. 

Авторы: Мерей Мұратханқызы